音樂才子方大同上月21日病逝，終年41歲。當年方大同聯同張繼聰﹑張敬軒和王菀之（Ivana）被封「唱作四小強」。張繼聰與謝安琪與方大同同期加入樂壇，是相識20年的好朋友，張繼聰得知好友死訊，只說「Sorry...太難過」。
今日（2日）凌晨張繼聰在Ig限時動態以黑底白字吐心聲：「今日好漫長，每次一停低，就諗番起好多以前嘅嘢，好多好多，越諗越多。忍唔住睇番我哋啲message，聽番你把聲。今日send咗好多message俾你，雖然你冇覆我，不過我知道你收到。
好多好多人同我一樣，為咗你，好難過，流咗好多眼淚，我想像到你嘅表情，你實係笑笑口話『唔駛啦﹗』，你咪俾我哋喊吓囉。
兄弟，之前就算幾耐冇見，分開幾遠，每次一傾番計（偈），都有一種『親密』，我會永遠記住呢種感覺，呢種親密就係我哋嘅聯繫，好多謝你對我同Kay嘅愛，Thank you brother﹗你好叻仔，完成咗一段超級精彩嘅旅程，You are our Legend，We love u Soulboy!」
王菀之則在Ig限時動態貼出心碎的emoji，並配以方大同歌曲《南音》悼念對方。
