鄭丹瑞的大女鄭瑤與金融才俊丈夫Jacob Chan去年註冊結婚，兩人早前補辦正式的婚禮及晚宴。鄭丹瑞今天（4日）出席活動時受訪，他談到可想早日抱孫時說︰「急得滯，大家仲心急過我，點敢講呀！不過，我有架七人車10年，諗住換架細車，想換時又諗到萬一做外公要擺好多嘢，都係留番架七人車喺度啦，等緊﹗」
鄭丹瑞回憶當日在婚禮上把女兒交給女婿時十分感動︰「我唔知點解衝口而出，叫女婿要好惜我個女。佢話一定好惜我個女，畀到佢幸福。我演戲幾十年，到咗呢個位都忍唔住，確係好唔捨得，但見到個女得到幸福，唔捨得都冇辦法。好滿意女婿？點敢話唔滿意﹗個女同外母話滿意就得，我負責笑咋嘛﹗」
他表示已向女兒及女婿分享夫妻相處之道︰「點解老婆英文係wife？如果將f變成s，就是wise，老婆就係聰明。老公英文點解係husband？冇咗個Hus咪就係笨囉﹗係天作之合，所以男人要成日保持笨笨嘅心就得。希望佢哋執子之手，與子偕老﹗呢個就係我對佢哋嘅祝福。」
