女團COLLAR成員陳泳伽（Winka）昨天（7日）推出今年首支個人單曲《今期不流行》，這是她繼去年6月推出《下回分解》後，相隔11個月再次推出的個人歌曲。原來過去一年，Winka身體及聲帶出現狀况，原定去年推出的《今期不流行》押後至今年才灌錄。雖然聲帶已不能百分百回復昔日聲線，Winka保持樂觀心情，接受及適應新聲線，希望大家喜歡她新的歌聲。
《今期不流行》由黃偉文填詞、黃兆銘編曲、Winka亦有份參與作曲。歌曲以苦戀為主題，希望透過歌曲為苦戀路上的人作鼓勵，陪伴着他們痊癒。Winka說：「大家覺得苦戀係好痛苦，唔知點樣走出困局，但有時要勉勵吓同自己講『今期唔興，唔好再為對方傷太多，要做一個開心、堅強嘅人』，所以我想寫一首歌陪伴大家痊癒，帶希望畀大家，為愛情路上碰釘嘅人作鼓勵。其實愛情只係生命裏其中範疇，相信之後遇到嘅人和事，唔會畀今日差。」
為呈現歌曲氛圍，MV於大嶼山下長沙泳灘取景拍攝。Winka表示：「其實呢個沙灘對我有一個特別回憶同情感，呢個沙灘係我6年前（未入COLLAR）自己拍cover搵嘅沙灘。今次MV拍攝，我同製作組提議呢度，好開心，佢哋真係揀咗喺呢個咁偏僻嘅沙灘取景。」Winka在MV中跳現代舞，她說：「其實加入現代舞嘅決定係比較臨時，現代舞對我嚟講較陌生，唯有不斷向身邊跳開現代舞嘅朋友問意見，算係一個挑戰。」
提到相隔一段時間才再推單曲，Winka透露《今期不流行》原定去年推出，但因當時身體出現狀况，至今才完成。她說：「因為嗰時身體有啲狀况，聲帶亦有啲狀况。其實呢首歌本身上年推出，但一直等身體好嘅狀態先錄，今次都係慢慢咁錄，仲特登深夜凌晨先錄，帶出脆弱聲線，所以把聲沙沙哋。其實我依家聲帶冇得永遠好番，就好似出雀斑咁，只可以淡化。我接受永遠同適應相處依家把聲，依家瞓少咗、飲少咗水就會有啲聲沙，但覺得新嘅聲線都OK，希望大家會喜歡。」
