基仔爆祖兒醉酒瘀事:攬完馬桶嗌好玩

文章日期:2019年08月25日

【明報專訊】容祖兒19場紅館演唱會昨晚圓滿結束,前晚第18場的嘉賓是古巨基(基仔),他大爆容祖兒飲醉酒的傻事。祖兒介紹基仔出場時形容他特別專一,同老婆一齊會不停掃背脊,似幫細路仔掃風一樣,又鍾意講爛gag。基仔出場與祖兒合唱《愛得太遲》,之後祖兒責怪他這麼遲才來做嘉賓,是否忙生仔?基仔說:「未未未……我搞緊啲影視工作。」

容祖兒笑到趴地

基仔此時開始爆祖兒瘀事,說祖兒是好乖不識飲酒的女仔,有次霍汶希(Mani)與祖兒到他的屋企食飯,祖兒因之前有朋友生日遲到。基仔說:「當時祖兒到了我樓下按對講機,Mani即刻落去接她,但Mani 上來時話:『佢呀,喺樓下,保安同佢講,容小姐你可以入去,但她反問保安,你點知我姓容㗎!』嚇到Mani即刻扯她走。」祖兒聽到笑到差點企不穩,說不記得了。基仔續說:「你上到我屋企已經醉醉哋,第一件事坐喺地下,跟住向天不停發功,我以為你整整吓成個人可以飛起!」祖兒已經笑到又跪又趴在台上。基仔再說:「跟住你入咗廁所,班朋友話你好耐未出嚟,Mani不停敲門,但你無反應,之後個門鎖鬆開咗,見到你攬住個馬桶。我哋扶你起身,你話:『基仔!我發誓呢度係我嚟過最好玩嘅地方!』我唔知個馬桶咁好玩,早知我都玩吓啦!」全場爆笑。基仔還說當時有拍片。

祈求尾場演出順利

昨午容祖兒在紅館進行拜神儀式,祈求最後一場演出順利,大批歌迷守候。祖兒上香後走到歌迷前面揮手及取禮物,表現興奮。她風騷談到基仔爆料,「噚晚(前晚)古巨基笑死我呀」。

記者:鍾偉茵

■更多娛樂猛料 ﹕ol.mingpao.com