【明報專訊】蔡少芬與陳法蓉趁新年下廚煮賀年菜，跟大家拜年。兩人相識逾20年，煮菜時「針鋒相對」製造笑料，她們都煮得有板有眼，「美貌與廚藝並重」。蔡少芬自誇「煮咩都ok」，女兒上學的飯盒及點心都是她一手準備；不過兒子出世後，忙於照顧才疏於入廚。蔡少芬讚陳法蓉蒸嘢好叻，大家叻在不同範疇，又追問陳法蓉有否曾為男友下廚？陳法蓉說一定有，她用愛心煮簡單菜式，一定好食。
蔡少芬爆料笑說：「我本來打算契個仔畀佢（陳法蓉），等佢有條仔，而且仲係靚仔，點知佢唔肯！」陳法蓉反擊：「點解要契呀？分身家畀你個仔呀？我有好多朋友都有小朋友，好難個個契，而且我又好鍾意你細女，唔通女我就唔契，仔就契咩？既然我同你關係咁好，唔使契啦！」
她們又爆當年合演內地劇《水月洞天》時，各自的粉絲在網上互罵，分別鬧蔡少芬是「冇飯食嘅排骨」，鬧陳法蓉是「匿喺濛鏡後嘅老妖怪」，最後她們拖手跟粉絲表明友好，才平息罵戰。
娛樂組
■更多娛樂猛料 ﹕ol.mingpao.com
