【明報專訊】《張敬軒 X 香港中樂團盛樂》紅館演唱會前晚舉行第2場，有圈中好友鄭欣宜、湯怡、陳家樂等捧場。張敬軒（軒仔）換上一套黑色新西裝，前後透視若隱若現，觀眾看到嘩嘩聲叫靚仔。軒仔笑說：「成晚背脊有啲涼浸浸。」他繼續拿傭人「遮遮」的早餐開玩笑，並說：「呢個背脊一粒瘡都無，就係日日食白粥同麵包食返嚟，我直情開始食到有啲妊娠紋𠻹。」觀眾報以掌聲及笑聲，軒仔無奈說：「你話唱得咁辛苦為乜，『遮遮』重多掌聲過我。」他大爆「遮遮」身世，稱對方曾長時間在台灣工作，識講80%國語，軒仔一心希望「遮遮」照顧來港一同生活的父母，因雙親不懂英文，可惜疫情關係，父母來港計劃一再拖延。
軒仔又透露演唱會前知道有名歌迷去年已買飛，但今年離開了來不到，希望對方在天之靈，聽到他的歌聲。他稱就算經歷很多不開心，做人不可被情緒干擾，要找一些快樂及滿足感給自己，他笑說：「你哋多謝我啲早餐post，我反而好榮幸，通過我的不幸為大家帶來咁多娛樂。大家開心，我就開心。」
娛樂組
■更多娛樂猛料 ﹕ol.mingpao.com
