【明報專訊】沈卓盈今年元旦宣布與老公Calvin造人成功，一索得男。沈卓盈昨日宣布B仔已出世，她在社交網上載一家三口全家福，表示囝囝Jayden出世時重6.2磅，喊聲好響亮。
沈卓盈向傳媒表示老公陪她入產房開刀分娩，以及親手為BB剪臍帶，整個過程很順利。她生B時好緊張，當聽到BB喊聲和看見BB一刻，禁不住哭起來，老公跟她一齊見證BB出世這寶貴一刻，好感動。她表示家人說BB額頭及嘴仔似爸爸，眼及鼻就似她；她就覺得BB睡覺時似爸爸，眼仔睩睩時就好似她。新手媽媽沈卓盈產前沒特別上堂學習湊B，邊湊邊學，身邊朋友給她溫馨提示，說初生BB最初幾個月較難湊，她已有心理準備，笑言第一次幫BB換片時，BB已請她和老公「飲茶」，一日請兩次，真的狼狽但又好好笑。雖然湊B較辛苦，又攰又不夠瞓，但每個過程都好享受同開心。她只希望BB健康，食得又瞓得，她亦為囝囝作好準備，經歷人生另一個新課程。
娛樂組
