唐奕聰離世前拍太極紅館騷海報

文章日期:2021年06月25日

【明報專訊】太極樂隊將於8月7日及8日在紅館舉行兩場《Rainbow After Rain演唱會》,成員唐奕聰(Gary Tong)離世前參與海報拍攝,隊友們聚首一堂,西裝骨骨有別平時「Band仔」造型。當時Gary預測演唱會舉行時,疫情將會過去,叫粉絲準備寫心意卡表達愛意。

靠黎明造型師幫手變靚仔

鄧建明(Joey)笑稱看不慣隊友這樣斯文,全靠造型師幫手變靚仔。他們今次搵黎明御用造型師幫手,Joey說:「大家都Sharp晒,我不敢講是『黎明Look』,我只是黎明身邊飛過的一隻小雀仔。」拍攝期間主音雷有輝「爆呔」,要工作人員幫忙補褲,場面尷尬,他說:「因為我哋著西裝,衫太貼身,我執嘢時聽到一吓聲,就知道出事!我都想演唱會可以著到咁靚仔,可以夾兩三首歌,不過Ricky(朱翰博)一定會打鼓打到爆晒衫!」Ricky自嘲似賣保險,不及雷有輝靚仔,甘願將靚西裝讓給對方,「他套西裝我都有著過,但我不及他靚仔,一場兄弟讓畀他」。他透露演唱會有好多朋友來支持,到時或會超時被罰錢。

娛樂組