【明報專訊】ViuTV選秀真人騷《全民造星IV》將於11月1日首播，96名參賽者的造型照昨日曝光，雖然不少網民嫌照片質素麻麻，但也有人讚影得幾靚。96強中有不少高質靚女，當中包括1號蘇雅琳（Ivy So）、2號黃雅慧（咖喱）、33號黃敏蕎（阿妹）、70號郭東彩（東東）、87號葛綽瑤（Yoyo）、90號鄭嘉欣（Christine）等，Christine曾參加《造星III》，7號梁式昕（Catrina）更被指似日本女星新垣結衣。
余香凝胞妹10號余潔滢、歐陽巧瑩妹妹51號歐陽巧霖（Bubu）、ERROR成員193（郭嘉駿）胞妹96號郭嘉盈（3妹）同樣惹網民關注，其中3妹造型照被網民彈影得麻麻，紛紛在相片留言，「呢張相3妹想殺人咁款，搞錯啊……」「張相影得麻麻喎……之前睇3妹接受訪問時，個樣可愛好多。」等。
3妹分享參賽原因
3妹近日在社交網發文分享感受，稱一直都沒有自信，故參加《造星IV》令很多朋友驚訝。她說：「當我人生好迷惘嘅時候，我見到節目招募，突然叮一聲，我唔想呢世人咩都無試過就咁過咗，我唔想到老咗，先後悔一生平平淡淡，後生都唔突破自己，連想做嘅嘢都唔去嘗試，唔係要成功先去做，而係唔試就一定唔會成功。」她感激由踏出comfort zone後，一直支持她的朋友及途中所有對她好的人。
娛樂組
