【明報專訊】「腦細」林日曦繼去年的《大MK日》後，決定在疫下再搞舞台劇，以「久違了的癲喪式『乜都唔L知優先訂飛』歸來了」為題，於社交平台宣布今年內演出全新舞台劇，表明未知日期、時間、地點、劇目、演員及題材，並留言：「事隔幾年，個世界唔同晒。有些人離開咗呢度，有些人入唔到劇院。相比起第一次，今次可能少咗啲人嚟，雖然𠵱家搞演出必定困難重重，但人生苦短嘛！唔諗了，少人都搞住先。」
林日曦宣布上次零資料訂飛是2019年首次talk show《悲但真》，強調今次舞台劇劇本已寫好，在家中綵排中，只等大家再一齊癲。他呼籲仍想入場的觀眾今日上午可以登記訂飛，並保證說：「唔使同人爭，一定訂到飛（98%）。（除非個數去到我冇可能訂到咁多場，但基本上唔會發生）演出會盡量喺5月份舉行，但萬一book唔到場，一年內我都一定找數，否則退款。但係講明先，我乜都唔知。」
娛樂組
