【明報專訊】張敬軒（軒仔）、魏浚笙（Jeffrey）昨日到尖沙嘴出席活動，一起擺出巨型心心甫士拍照，令現場逾百粉絲尖叫，場面熱鬧。軒仔透露接拍以尋寶歷險題材的賀歲電影《超神經械劫案》，難得擔正主演，故碌盡人情卡，除跟Jeffrey演出生入死的解款員，又與王菀之大打出手。該片有好多外景，上山下海拍動作、爆破和槍戰戲，軒仔預計會辛苦，加上對手都是實力派，所以要努力做功課搵個定位，拍攝前學射擊，又要拉筋。
軒仔爆金牌導演想識Jeffrey
軒仔稱將濕身場面交給Jeffrey。Jeffrey表示為騷肌做準備，免得出醜。有指Jeffrey體能似比軒仔優勝，軒仔即反駁：「邊度睇得出？我都食過夜粥，家傭『遮遮』煮的。事實劇組人員大部分30歲以下，個個年輕力壯，未拍已好開心，好有士氣。」首次拍電影的Jeffrey感興奮，「我好喜歡角色，背對白時都覺得好搞笑」。
軒仔對Jeffrey讚不絕口，看好他有望問鼎新人獎，「電影圍讀時，他已很有節奏感，角色似度身訂做。之前在私人場合聽他唱《春秋》，很好聽，若他進軍樂壇無得頂，這個年代，新一代不一定要簽大公司，可以自由選擇如何發展，有好多發揮。近日有金牌導演向我提出想認識他」。Jeffrey感激軒仔提攜，承諾要請食飯以表謝意。
手腳不協調 跳唱機會低
另外，Jeffrey前晚一身熒光粉紅打扮出席品牌活動，獲大批粉絲到場支持，大讚他靚仔有型，他識做微笑揮手又派心心。Jeffrey透露有意進軍樂壇，正跟老師學唱歌，已秘密練兵約8個月，亦打算徵詢好友呂爵安（Edan）意見。他自爆喜歡林宥嘉的歌，但未敢視對方為目標。會否做跳唱歌手？他不排除這個可能，但機會極低，因他有少少手腳不協調；希望加緊努力訓練，做到心目中想做，但暫時未想跳唱。
記者：鍾一虹、林蘊兒
攝影：劉永銳
■更多娛樂猛料 ﹕ol.mingpao.com
