演唱會疑藉籃球念故友錢國偉 鄭伊健哽咽談社會變化盼多溝通

文章日期:2022年11月29日

【明報專訊】一連9場《HERE & NOW鄭伊健演唱會2022》前晚舉行尾場,馮德倫與太太舒淇、錢嘉樂湯盈盈夫婦拍拖入場支持,鄭伊健不忘再次公開感謝蒙嘉慧冧老婆。全晚落力演出又唱又跳,上衣全濕「透點」,觀眾大叫除衫,他婉拒笑稱不是脫衣女郎。舞台上一直放了一個印有「Wilson」的籃球,似為紀念已故好友錢國偉(Wilson),伊健在尾聲唱完《我的歌》後特地將籃球帶回後台。在encore環節伊健稱是自肥計劃,逼大家看他想做的事,穿上Roller鞋在台上滑行獻唱《陪你飛》及《你的我》,到第二次encore不禁鼻酸哽咽道出開騷因由。

記者:林祖傑

伊健今次演唱會主題及編排惹來不少解讀,他在台上表示相隔3年多再開騷,覺得變化好大,「好多嘢發生咗,大家都估唔到,好多衝擊,所以我們才用特別的方法將世界時事演一次,希望大家用一種抽象形式感受下,但我相信大家學識一樣嘢,就是珍惜。至於見到3個火桶,大家有很多諗法,我就好簡單,只諗到燒嘢食,每次見到燃點起的火,我就諗到一個願望,希望大家下次睇演唱會不需要戴口罩,另外嘅願望大家就自己諗,相信大家諗到的或希望的,都一定會得到」。

戴罩途人木無表情感難受

到第二次encore,唱最後一首歌《可樂》前,伊健提及內心想法,道出開騷原因,他說:「為何搞這個騷呢?這幾年見到大家戴口罩,臉上無乜表情,我響街撞到好多人,佢哋隻眼好似睇唔到嘢,亦都唔知身邊啲人發生咩事,覺得呢種感覺好難受……」說到此,伊健情緒激動轉身平復心情,語帶哽咽表示要先冷靜一下,再續道:「以前唔係咁,大家會打招呼,有講有笑,所以就開始諗,我有咩可以做到,我係一個藝人,要做番自己本分,一係唱歌一係拍戲,既然陳光榮的作品可以打動大家,那就開演唱會。希望今(前)晚之後,戴口罩只係軀殼,只要裏邊無改變過就得,其實人與人之間係需要溝通,呢個係我一番小小心意,希望大家聽得懂。」

伊健完騷後受訪,表示太累不願多談,他稱最後一場特別感觸,有不捨得是很正常,做完騷最想休息。問觀眾要求除衫,下次開騷可會考慮?他說:「點解要除?我演唱會從來冇除過衫。(知否汗水令上衣濕到變透視裝?)我睇唔到,咁咪好睇過除衫囉。」提到表演踩Roller,他說:「每日都有新諗法想令大家開心,對鞋今(前)日先拿出來試吓得唔得,又得喎,咪唱隻歌囉,讀書時已學識。(以前用嚟追女仔?)追唔到啦。」

避談籃球是否跟Wilson有關

談到台上放了印有「Wilson」的籃球,是否有所含意或是與錢國偉(Wilson)的回憶點滴?他說:「沒有含意,只是陳設,我買㗎個波,我𠵱家想打籃球呀嘛。」不是與Wilson有關?伊健避談:「不要想太多,咁啱啫。你咁問,走喇,bye bye!」

■更多娛樂猛料 ﹕ol.mingpao.com

相關字詞﹕舒淇 馮德倫 演唱會 鄭伊健 每日明報-娛樂