【明報專訊】羅子溢與張曦雯（Kelly）昨日出席代言美容中心活動，現場播出兩人的新廣告，前者騷6嚿腹肌，後者大曬美腿。羅子溢為拍廣告勁減20磅，「我之前似叔叔，努力收身後，老婆（楊茜堯）都讚我變靚了。拍廣告前幾日我斷食只飲水，感覺似去參加健美比賽」。Kelly拍攝前亦保持飲食清淡，「我戒食鹽和澱粉質，以飲水為主」。
Kelly表示早前趁媽咪來港，一齊去美容。網民指母女不似樣？她說：「因我似爹哋，細佬似媽咪，所以我同細佬完全不似樣。我見好多網民讚我媽咪後生，事實上父母都保養得好，爹哋似羅子溢有6嚿腹肌。」
羅子溢希望女兒將來讀大學時，他仍能保持年輕，父女可以拖手出街，被人誤會他是女兒的男友，「女兒現在去人多地方和停車場會拖住我，感覺可以保護她。」談到早前陪女兒參加學校旅行，於社交網分享女兒正面照。他說：「女兒開始長大，大家想知她長相，照片是我影的，影得好靚，所以好想分享。見網民留言話女兒好靚，個樣似我，我有點安慰，希望她將來似Kelly那麼靚去選美。」
