【明報專訊】張學友與張文新擔任無綫節目《馬時亨‧香港情》首集嘉賓，談到近年內地有好多歌唱真人騷節目，張文新問到傳聞曾有製作單位出動9位數字酬勞，但未能打動學友擔任評審或導師，學友大方承認，解釋拒絕原因。他說自己是歌唱比賽出身，覺得比賽好不容易，夠膽企上去唱已經好犀利，他不忍心說不好。還有做導師或要教唱歌，他真的不識教，本身不是正統學唱歌出身，無本事做導師。
讚炎明熹唱得好
學友稱以前做歌手靠運氣為主，現在做歌手背後有系統支持，「像韓國有系統培養新一代，還成功將成個國力提升。人哋做緊嘢嘅時候，我哋仲喺度食緊老本」。他提到覺得炎明熹唱歌好好，但在《聲夢傳奇》後，什麼節目都做，「跟住有一日我見到她唱歌冇晒力，我感覺到她是攰到冇晒力」。
學友表示對香港有特有的感情和情懷，「因為我在這裏出世及長大，在香港得到我所有嘅嘢。二三十年前有人話移民去新加坡，我諗咗好耐，都是不好。之後又有話移民去加拿大，我上過去加拿大領事館，但坐喺度一諗到以後要對住的全部是外國人，個心就頂唔順，又走了。我係裙腳仔，黐住喺嗰度就嗰度，對香港嘅感情真係放唔低」。
娛樂組
