任ERROR新歌MV女主角 保錡將孫佳君認錯劉嘉玲

文章日期:2023年09月13日

【明報專訊】ERROR昨日推出新歌《枱底隧道》,MV由電影《流氓師表》導演麥啟光操刀,特別邀請孫佳君擔任女主角,拍攝前一晚才通知ERROR。吳保錡直認聽到嚇呆了,又自稱有睇開孫佳君的戲,卻被肥仔(梁業)踢爆,「保錡不停講孫小姐嘅作品,但全部錯晒,冇拍過嗰啲全部都噏晒出嚟,嗰個moment笑到暈低」。保錡解釋:「成日以為孫佳君同劉嘉玲係同一個人,都有少少尷尬,不過咁樣氣氛反而和前輩快熟咗,我們還交換了Instagram和電話號碼,有傾有講。」

首次演出MV的孫佳君,今次不單演戲,還要跳高難度性感Chair dance。肥仔知道後大吃一驚,「佢跳緊嘅時候,我哋仲喺化妝間休息,知得太遲。」他埋怨導演自肥不通知他們。

孫佳君表示只在拍攝前跟排舞老師學了個半小時,拍攝時排舞老師不在場,加上張櫈比排練時高,難度大增,「好驚跳得唔好睇,好彩疫情期間有跟Sunny Wong學跳舞,所以都過得去,我未睇個MV,希望大家唔好笑我跳得唔好」。

娛樂組

相關字詞﹕孫佳君 每日明報-娛樂