聖誕除夕開騷 RubberBand邀志同道合度佳節

【明報專訊】RubberBand早前到歐洲、美加與台灣舉行巡迴演唱會，12月回歸香港，昨日公布將於聖誕與除夕，12月24至25日，以及30至31日在九展舉行《RubberBand 音樂會》。今次選在九展Star Hall演出對RubberBand別具意義，主音6號（繆浩昌）說：「2009年RubberBand舉行首個演唱會就係喺Star Hall，因為係第一次專場，所以呢個音樂會喺我哋心目中永遠都有個位置。嚟緊九展會改建，我們希望喺佢完成歷史任務前，嚟番呢度再開音樂會，體會番2009年嗰陣，我哋嗰份青澀同初心之餘，同時檢視自己有冇遺失、違背昔日的心態。另外亦呼應番我們今次音樂會主題『搵番一啲方法同自己相處，以及重新學習同世界相處』。」

RubberBand同時推出第10張專輯《Juntos》，他們稱「Juntos」是西班牙文，有「一班人共同完成一件事」的意思，演唱會與專輯同名，兩者有一脈相通的目的。6號稱香港在過去3年經歷疫情與移民潮等，時間似停了，但同時大家又急速成長，要重新學習再跟世界、香港，以及好珍重的人相處。有人無信心前行，希望透過今次音樂會跟大家分享，最重要是搵到方向，然後跟志同道合的人在一起做一件事。

娛樂組