【明報專訊】組合C AllStar成員陳健安（安仔）一連4場假麥花臣場館舉行的《Live afteR Life 陳健安2024演唱會》，周日（3日）圓滿結束，安仔媽咪坐第一行看足全場，感動到又喊又笑，還跟觀眾一同站起來揮手跳舞。完場時，觀眾不肯散場大叫安歌，安仔再上台向觀眾席拋紀念冷帽，Lolly Talk成員黃詠霖（阿蛋）接到，興奮立即戴上。觀眾大叫「除衫」，安仔扮聽不到，連唱3首歌後，突然除去身上演唱會T恤拋往台側觀眾席，全場尖叫起哄。
安仔完騷後表示開心又感動，首次一個人唱4場騷，之前有點擔心，完成後好滿足。他透露母親看了兩場，「開場第二首歌《愛的一種練習》，每次唱都會搵吓媽媽。之前我開新碟發布會專登唔唱呢首歌，留返演唱會唱畀佢聽。第一場完騷後，佢同我講聽到喊，我話我喺台上睇到」。
提到表演嘉賓之一女歌手廖穎琛大讚安媽悉心打扮，安仔大爆：「媽媽專登化妝set頭，佢平時唔化妝，但每次捧我場，例如之前頒獎禮，佢就會化妝扮靚，隆重其事，代表好支持我。」完成4場騷後，安仔最想食火鍋和飲凍檸茶，「食肥牛、炸響鈴，仲要有鹹蛋黃嗰款，唔邪惡唔食」。
娛樂組
