【明報專訊】溫碧霞、余香凝、沈震軒及關楚耀等前晚出席電訊公司周年慶祝活動，陳浩民與麥大力亦有到場，巧合同樣撐拐杖現身，前者因落樓梯「拗柴」扭傷右腳，後者滑雪跌斷股骨仍未痊癒。陳浩民自嘲是「傷健一家親」，當見到昔日合作拍無綫劇《封神榜》的拍檔溫碧霞時，笑言「哪吒與妲己」敘舊。
溫碧霞一頭長髮是標誌，日前發生火燒頭髮意外，幸只是燒燶頭髮面層。她前晚憶述意外經過時猶有餘悸，「好驚！嗰日影相，無留意後面有蠟燭，我挨住枱、頭髮向後，好彩助手見我頭髮後面着火，好快手咁幫我整熄，否則毁容，真係好危險，驚魂未定已感覺到後面頭髮斷晒兼好大陣燶味，好恐怖，幸頭髮夠厚，遮着背脊沒燒傷皮膚，只燒到面層頭髮」。
陳浩民表示日前扭傷腳以為小事，幾日後見醫生照X光才知骨裂，現時出入要套上骨折固定鞋加拐杖輔助，「行路有少少痛，還有抽筋，5星期後覆診，慶幸5月才為新戲開工，到時盡量遷就，對工作影響不大」。
