夏韶聲謝絕探班保神秘感 鄧建明街頭Busking有壓力 (17:41)

文章日期:2021年10月26日

夏韶聲和鄧建明的演唱會舉行在即,二人秘密練兵,為保持演唱會神秘感,由海報拍攝、練歌、製作會議時,他們也謝絕非「核心成員」參加。

夏韶聲笑指多年未舉行演唱會,一直深居簡出,鮮有以「靚佬」造型示人,「幾耐未試過set呢啲咁勁嘅髮型,啲佬味真係出晒嚟!其實呢個騷係『概念音樂會』,視覺、聽覺都要有不一樣感覺,我哋要集中精神做準備,所以唔畀宣傳團隊參加綵排,怕佢哋爆晒出嚟冇神秘感」。

鄧建明表示演唱會已準備得「七七八八」,與「阿公」夏韶聲同台感興奮,「佢同我嘅關係唔需要再多講,我可以同呢位前輩合作,真係興奮到瞓唔着!Danny Summer(夏韶聲)不時會有新idea,每次開會都會覺得好正,咁要辛苦導演、監製,不時幫我哋改rundown、改舞台,所以我話準備得『七七八八』係因為隨時可以上台唱,但其實rundown可能次次開會都變緊」。

雖然夏韶聲口密拒透露個唱細節,不過鄧建明就自爆舞台「秘密」:「今次演唱會舞台係好特別,觀眾抬頭都望到星空感覺,Star Hall有史以來都未做過咁嘅效果,現場所有觀眾都係超近距離接觸舞台,仲會有好特別嘅燈效同laser,配合『Arrival  Departure』超現實主題。」

鄧建明早前與太極隊友雷有輝(Patrick)首次街頭Busking,2人作為「Busking界」初哥,感到無形壓力:「其實Busking就當係練歌,順道畀人知道呢個騷當宣傳,但係Busking真係有壓力,音響、結他要自己setup,後來大家知道係我同Patrick唱緊,慢慢圍埋嚟睇,呢啲現場感仲正過紅館。」

(即時娛樂)

 

相關字詞﹕夏韶聲 鄧建明 演唱會