練美娟單身4年只愛大叔 爆Edan愛𥄫女 Anson Lo多女冧 (21:45)

文章日期:2021年11月04日

練美娟(娟姐)近日接受林柏希訪問,擔任節目《月傾會》最新一集嘉賓。由2017年在ViuTV出道,今年憑港版《大叔的愛》成功入屋,拍廣告、做主持及有新節目,工作不斷。問她是否有當紅感覺?娟姐說:「我唔知道點樣為之紅,但係多人認識咗係真嘅!入咗行都幾年,之前主持一啲節目,當時喺條街度行,係冇人認到你。」

現年31歲的娟姐已單身4年,問到其擇偶條件,她直言只愛大叔:「我諗我偏向成熟啲,小鮮肉嗰啲我係一般!」林柏希單刀直入問娟姐幾多歲失身,娟姐爽快說:「18歲,合法嘅!死啦,我經理人抹緊汗。」

到重頭環節「大膽答 冇膽食」,今次要嘉賓決定落幾多調味「加料飲品」,有白醋、紅醋、豉油、Wasabi、檸檬汁同Tabasco,不敢回答的就要喝「加料飲品」。

話說娟姐曾在ViuTV節目《有酒今晚吹》,自爆曾親眼目睹有位女星姣惜TVB人夫場面,林柏希叫娟姐重演事件經過兼開名,娟姐聞言即面有難色,並表示真的不能開名,她只能還原目擊經過,娟姐即時「姣精」上身,示範當晚飯局入面女星姣惜TVB人夫場面。

林柏希再追問娟姐,ERROR肥仔(梁業)跟音樂人伍仲衡,都先後被七仙羽爆料,指他們喜歡娟姐,如果要二揀一,娟姐會揀誰?她說:「肥仔唔啱呀,我只能夠講肥仔唔啱!我真係介意另一半矮過我!」

至於伍仲衡,娟姐就話:「點解件事會發生呢?係我做飲酒個節目,跟住請咗Harry(伍仲衡)同埋師傅(七師傅)上嚟,跟住師傅就話佢一直留意我、好鍾意我,之後我哋交換咗電話話約食飯,但係我又忙、佢又忙啦!」

問到有關港版《大叔的愛》拍攝秘聞,劇中有MIRROR三子,究竟Edan(呂爵安)、Anson Lo(盧瀚霆)和Stanley(邱士縉)中,哪個最孤寒、最小器和最多女冧?娟姐聞言即答:「最多女冧一定係Anson Lo,無論青春少艾或者已婚人妻,你知唔知連我表姨媽都好鍾意佢!」

論到最小器,原來是Stanley,娟姐說:「我可以講嘅係Stanley,可能我同佢熟呀,佢成日都會對我小器囉,比如有時預咗好多嘢,佢會話『又冇預我,娟姐』,跟住我心諗,男人老狗唔好同我計呢啲啦,我好相信係因為佢同我熟,所以佢會咁樣同我玩!」

至於最孤寒,娟姐表示想不到,反而主動爆料指誰最鹹濕,她說:「我覺得Edan最鹹濕,因為佢血氣方剛,我成日見佢休息日子,都係睇女仔嘅Ig,我成日話,又𥄫女呀,佢話睇吓女仔啫。我唔敢講咁樣係鹹濕,但係佢對異性最有興趣啦!唔係鹹濕,但係成日𥄫女囉!」

(即時娛樂)