造星IV|部分參賽者「災難」演出 許廷鏗梁祖堯揀唔落手 (23:03)

文章日期:2021年11月04日

ViuTV真人選秀節目《全民造星IV》今晚(4日)播出第4集,部分參賽者的跳唱演出實在「精彩」,搞到兩位導師許廷鏗(Alfred)和梁祖堯,以及節目監製花姐(黃慧君)都Mean爆狠評!

其中Puipui跳唱《怪美的》,Alfred邊聽邊變臉,梁祖堯則說:「啱啱睇完兩個跳舞,你(Puipui)真係死梗囉!」花姐亦毫不客氣說:「算吧啦!Fade out咗佢條聲,cut咗佢!唔使聽,唔好嘥時間。」評判Donald問Puipui:「呢首歌係咪非唱不可?」

另一位參賽者Jade亦表現跳唱《The Way We Dance》,惟唱功不濟,聽到Alfred大嗌:「好驚呀!媽咪!」當Jade唱完後擺出嬌俏甫士,嚇得Alfred再大叫,花姐鬧着玩向Alfred說:「係你㗎喇!」Alfred高呼:「唔好,我預想嘅結局唔係咁㗎!」Jade表示很喜歡該首歌的歌詞,寓意等待被發掘成為鑽石,然後發亮,豈料Alfred在後台笑稱:「我感覺到我會多咗粒腎石,我搞唔掂!」

兩位導師揀不落Puipui或Jade入組,花姐說:「呢個難揀嘅原因,係兩個都咁差,唔知揀邊個。」最後Jade入了60強,她希望加入阿祖一組,不過最後反高潮,3位評判決定將Jade加入Alfred一組,Alfred立即打電話給評判Donald質問,十分搞笑。

接着出場的Elka唱鄭欣宜的《@princejoyce》,不過她表現同樣強差人意,更唱到走音,嚇呆其他參賽者及導師,她亦不滿意自己演出;另一參賽者「精靈」表演跳舞《美麗的神話》,但表現一般,同樣令兩位導師沒有撳燈,沒意欲揀她們入組,最後要評判決定,晉級60強的Elka自己想入Alfred一組,最後評判之一的鄭融則說:「咁你入Alfred嗰組啦!」

(即時娛樂)