張敬軒自封「樂壇關愛座」喜見有新血 讚張天賦「實偶派」 (13:25)

文章日期:2022年01月03日

張敬軒昨午(2日)在紅館舉行第9場演唱會,並邀來新鮮出爐的叱咤生力軍男歌手金獎張天賦(MC)擔任嘉賓,湊巧軒仔是叱咤男歌手金獎,兩位「金」人同台獻Sing,觀眾歡呼四起。

當邀請MC亮相前,軒仔表示自己坐在「樂壇關愛座」,最開心見到一班新血:「自己做過新人,我都係當年既得利益者,一步步進步,嚟到唔同位置,係多得好多前輩畀機會我,今日自己身為前浪,都有責任營造一個良好樂壇生態同良好新陳代謝畀樂壇。今年我哋見到好多優質偶像,優質創作人音樂人,今日呢位兩樣元素都有,佢可以話係『實(力)偶(像)派』。好榮幸請到佢來,呢大半年來我成日loop佢啲歌。」現場響起《反對無效》,觀眾即歡呼四起,MC出場同軒仔合唱。

合唱完畢,MC指住自己個西裝口袋,先發現他用公仔扮袋巾:「聽講呢幾日上你個台,都有交換禮物,我剛剛係後台聖誕樹上面見到呢隻嘢,好得意,火雞?係你個姐姐悉心幫你整早餐。」

軒仔笑言:「你個人都幾客氣喎,攞人啲嘢叫人送畀你,呢隻嘢生前係姐姐個早餐擺盤裝飾。既然你鍾意,我同你介紹番,呢隻嘢係有名堂,佢個名叫:『鵰!你企中間!』」全場爆笑,MC笑住反問:「鵰....你企中間?」軒仔整蠱他再反問:「你同我講呀?哈哈哈﹗」

軒仔解釋,這隻大名鼎鼎的「鵰!你企中間!」有寓意:「我哋無論做音樂、做人都要搵到自信,無論任何處境,都堅持自己信念企定喺中間,努力做自己音樂,就一定有人賞識。」繼而叫攝影師影張頒贈「鵰」儀式合照留念,場面搞笑。

輪到MC獨唱《記憶棉》,他開心說:「新年第二日,今年有幸得到新人獎,第二日就企上紅館個台唱歌送畀大家,真係好開心,你哋啲燈好靚呀!」

(即時娛樂)