林子博英國確診 發冷發燒周身骨痛 需自我隔離 (13:25)

文章日期:2022年01月10日

林子博去年8月底帶同一對仔女移居英國後,開設YouTube頻道分享生活點滴。身在英國的林子博自爆確診新冠病毒,他戴住口罩拍片談及確診經過:「1月7號夜晚,發覺自己有啲唔舒服,沾寒沾凍、發燒,周身唔聚財,feel到自己作感冒。當晚已經入房瞓,但半夜起身好辛苦,就食咗啲All In One感冒藥同埋探熱,當時體溫係38度幾,咁就做(病毒)快速檢測,當時未有嘢,就冇再理,覺得係普通傷風感冒。」

不過去到英國時間1月9日,子博跟他朋友說起自己病况,朋友認為他持續幾天發燒,應該是確診:「原因係我第一日做嘅檢測,身體含菌量唔係好高,出嚟結果唔係好準確,就叫我再做多次。當我再做一次,出嚟嘅結果就係...中咗﹗呢度有兩條線,『T字線』仲係好深色,我朋友話係我身體最多菌嘅時候,有中咗嘅朋友話我聽,過多10日8日,會睇到T字線逐漸淺色。當然唔開心啦,我中咗,第一時間叫仔女戴口罩,自己亦戴口罩。」

子博表示過去3日持續發燒,最高去到39度,他說:「今日就37度幾,算叫做好啲,暫時病徵冇喉嚨痛,有少少咳同鼻水,味覺係正常,希望係普遍嘅Omicron,依家冇辦法,惟有自我隔離,呢度唔同香港,呢度係要喺屋企自我隔離,咁我就可以睇住仔女,但我都擔心佢哋中招,唔知嚟緊佢哋會唔會發病,冇人知,希望唔會啦﹗」

子博表示原本他和囝囝一間房,女兒睡套房,現在他要自我隔離:「我自己一間房,阿仔阿女一間房,咁樣先真正隔離,如果惹埋畀阿仔就麻煩。」

子博就憶起中招前曾到過的地方:「我諗番起過去10日8日去過邊、做過乜、見過乜嘢人,第一時間打番畀佢哋,問佢哋有無中?除咗大除夕晚去咗伯明翰之外,我真係無周圍走,伯明翰嘅兩個朋友冇事,所以刪除咗係嗰度惹番嚟,咁究竟係邊度惹番嚟?應該係之後嘅事,但我冇乜點出去,冇同朋友開Party,一個聚會都冇,只係接送仔女返學,去超市買嘢﹑去油站入油﹑全程戴口罩,除咗揸車時冇戴,真係唔知邊度惹番嚟,最有可能係超市,有時啲包裝唔知有冇菌,一係就仔女喺學校惹返嚟,群體聚集只係學校,佢哋(仔女)一上車而我喺車內冇戴口罩,係咪因為咁而中呢?我真係唔知,我覺得好大機會。」

(即時娛樂)

 

相關字詞﹕林子博 居英 確診