吳浩康娶郭思琳喊唔停︰多謝佢願意嫁畀我 (20:10)

文章日期:2022年03月15日

吳浩康(Deep)與郭思琳(Margiela)今日(15日)舉行小型婚禮,正式結為夫婦,稍後才補辦婚宴。受疫情嚴峻、政府收緊防疫措施影響,兩人未能邀請太多親友出席,甚至是婚禮上很多裝飾也因為運輸問題未能送到,兩人只好走到山邊執樹枝裝飾婚禮場地。

正式註冊時,Deep跟Margiela喊唔停。Deep表示註冊時很緊張︰「冇諗過咁緊張,有好多感動,特別係我見到自己爸爸喺度,其實我都冇乜點停過喊。」Margiela見Deep不斷流淚,自己亦忍不住。她說︰「我冇諗過會喊得咁犀利。我一見佢喊,自己又忍唔住喊。佢太眼淺,我成日要安撫佢。」Deep坦言無論有沒有疫情,這場婚禮也十分難忘。他說︰「感謝太太嘅包容,雖然冇一個十全十美嘅婚禮,但亦都係疫情見證下嘅一個完美婚禮。」

談到婚禮上的「愛的宣言」,Deep表示已想了幾晚︰「都係圍繞住多謝佢,多謝佢願意嫁畀我、願意同我一齊去經歷我哋嘅人生、願意同我一齊去遮風擋雨。我哋各自對大家嘅承諾,就留番畀我哋兩夫妻啦,多謝大家嘅祝福同關心。」Margiela則說:「佢同我結婚已經係一個承諾,所以佢唔使講,我已經收到晒。」

問到Margiela婚後第一課,她笑說要見識婚姻的恐怖︰「我覺得有太多嘢要去學習,尤其是要學做一個好太太、好媽媽,同埋我和Deep嘅相處。呢個係人生課題,太多嘢要學。我都係啱啱新婚,暫時覺得我哋嘅相處係大前提。好多人話婚後係另一個境界,我都想快啲經歷吓,睇吓有幾恐怖,哈哈。」

Deep被問到胎兒性別時說要保持神秘,暫不透露。他說︰「仔定女都會好鍾意,我都好期待。我哋依家專注喺第一個小朋友度先,因為都係第一次做爸爸媽媽,有好多嘢未知,好多情况要兼顧。」Deep透露老闆楊受成會送大利市給BB︰「楊生話會封大利市畀我個BB,其實收到老闆嘅祝福已經好開心,因為老闆真係睇住我成長,照顧咗我20年,都係我半個爸爸。有自己咁尊敬嘅人嘅祝福,已經係好大嘅禮物。」

相關新聞︰吳浩康今娶郭思琳 婚前緊張到失眠 綵排已感動流淚

(即時娛樂)

相關字詞﹕吳浩康 郭思琳