演唱時有神秘男聲嗌「成件事好正」 許廷鏗罕有放負呻唔開心 (11:17)

文章日期:2022年04月25日
演唱時有神秘男聲嗌「成件事好正」 許廷鏗罕有放負呻唔開心(ViuTV網上片段,剪接:鍾偉茵)

許廷鏗(Alfred)昨晚(24日)在ViuTV《CHILL CLUB推介榜 年度推介21/22》演唱歌曲《修羅場》時,疑有工作人員忘記熄咪,現場傳出一把男人聲,不斷講「成件事係好正㗎!」、「睇整體㗎!睇整體㗎!」、「總之我同你講,成件事係perfect㗎」、「keep going keep going」,事件惹網民熱話:「睇睇下心諗咩料,仲以為自己聽錯」、「以為係旁白,因為許廷鏗冇受影響咁,好專業」、「冇爆粗嗰下仲犀利」等。

Alfred事後在社交網罕有放負:「睇返演出的直播,容許我真係有少少唔開心,唔係想怪責,但係花心機時間綵排演出,就係希望盡善盡美,可以令觀眾視覺聽覺有享受,喺台下一路做觀眾,我都真心覺得個show好正,所以更加想做好自己嗰part,好少咁樣放負,呢個story得24小時,俾我抒發一下,我仍然相信大家在努力,為着令觀眾知道表演是一門專業的學問,好啦﹗冇咩事我繼續努力準備出碟事宜。」

之後Alfred再在Instagram貼相,以「對專業的執著」為題抒發感受:「看到這樣的百花齊放,好多演出都令我 雀躍,所以同自己講了一句:『一定要好好的去表演』,因為重視所以盡力,因為在意所以失落,因為不值所 以抱憾,今晚讓我這樣一晚,明天還是會去盡力,為我的工作和唱片,為證明行業的專業,為回饋大家的支持,好少這樣表達失望,收到大家大力鼓勵,謝謝你們愛護包容,讓我任性放個負,#明天一切如常。」

不少網民留言安慰Alfred:「塞翁失馬,焉知非福,令更加多人知道你嘅實力」、「支持你,你今晚唱得好好,you are the best」、「唔好咁灰啦,呢啲嘢好難預料得到,雖然佢哋做錯咗,做好本分就OK啦!」

(即時娛樂)

相關字詞﹕許廷鏗 修羅場 放負