【明報專訊】近日全城熱話當然就係特首選舉，我哋大人固然各有心目中支持嘅人選，而且鍾意點評論都得，但係小朋友就好難完完全全了解成件事。中小學仲話有常識科通識科，可以喺老師講解同討論下認識多啲，但係仲讀緊幼稚園嘅幼兒，又無可避免接觸到呢啲新聞，一旦問起上嚟，真係考起唔少爸媽。
其實唔少幼稚園學生都好醒目，不但會有時睇下新聞，甚至要做剪報功課。我哋應該點樣客觀同佢哋講呢件事呢？Mama個朋友「小腳板田野讀書會」創辦人Wendy Yan，佢囝囝就係讀緊K3，Wendy話因為唔想囝囝咁快近視，所以平時冇畀佢睇電視，但係有時落到街、去到茶餐廳，都會有人講緊特首選舉，仲加插唔少批評同竟見，小朋友就全部聽晒。Wendy雖然一向都幾提倡同小朋友一齊關心社會，但係佢話要坐定定開宗明義咁同阿仔上一堂公民教育，又好似冇咁嘅必要，反而從生活中或者利用繪本去滲入就更容易。
「關於特首選舉這課題，我會用『揀水果』嚟做比喻。我同佢講，𠵱家老師要投票，睇下大家喺三種水果中揀食邊一款最好，但係就並非每個人都有得投呢一票。」佢話呢個例子小朋友會較容易明白，而即使自己立場係點，都盡量持平向囝囝介紹每個候選人。
不過佢話有一次晚間故事時間，囝囝隨意揀咗一本公民繪本《街道是大家的》，講一班小朋友為爭取建自己嘅遊樂場提出各種訴求，不過冇乜人理，直至傳媒公開事件，市長終於出現，但都只係因為選舉臨近而做表面工夫，最後都無動工。「雖然故事係發生喺好耐之前嘅真人真事，但我覺得情况同現今社會其實好相似，故事咁啱又提到傳媒嘅力量，當時又咁啱網上有好多競選團隊嘅宣傳活動，所以我覺得成個故事就係香港正正發生緊嘅事，一啲都冇脫節。」
討論勿加太多價值觀
Wendy話其實唔使逼小朋友去討論政治議題，好似佢咁，一本書就帶過呢個話題，囝囝當時仲話﹕「乜個市長咁衰嘅？」但佢話家長並唔使加插太多意見同價值觀落去。「如果小朋友問到，做父母嘅當然可以講，但係一啲比較激進嘅意見，就唔使同佢哋談論住，因為呢個年紀好多時只係識『複製』聽返嚟嘅意見。正如呢排有啲法庭新聞出咗，我會同佢講任何行業嘅人都有機會做錯事或者犯法。只要同佢哋講返事實，再慢慢建立佢哋嘅思考能力同價值觀就得。」
