有話說﹕陳美齡搲爆頭的教科書

文章日期:2017年05月16日

【明報專訊】近排教育界嘅城中熱話,梗係猜猜教育局長是誰呢?早前盛傳陳美齡(Agnes)係人選之一,雖然佢已經否認,話唔打算加入新一屆政府;而呢幾日,坊間又傳現任教育局副局長楊潤雄將會坐正。不過,Mama同班師奶friend都覺得,世事無絕對,梁特首夠講過「N屆唔選特首」啦,所以Agnes會唔會有朝一日真係成為我哋嘅教育局長呢,依然係一個好富娛樂性嘅話題。

作為家長,Mama都有買Agnes本新書《40個教育提案——把快樂帶回給香港學生》。佢嘅改革意念係咪真係實行到,Mama無資格講,但近年大家只係埋怨香港細路讀書辛苦,但唔見有人拋出具體改革方案,如果呢本書做到一石激起千重浪,都有佢嘅價值。

課本要有核心道德價值

書中40個教育提案之中,其中一個係「評審教科書」,原因係小學唔同科目嘅教科書,質素良莠不齊,尤其係英文教科書。Mama早幾日掹車邊見到Agnes,佢就鬼咁肉緊同Mama呻,剛剛睇咗一篇好差嘅reading,嚟自一本高小英文教科書。呢篇reading講到有個媽咪正喺廚房煮飯,一對姊弟喺客廳玩,時候差不多,媽媽就叫兩個細路幫手開飯。點知姊姊話自己成日幫手洗衫、摺衫,做好多家務,於是就推搪叫細佬去幫手開飯;但細佬又話自己都成日拖狗出街,又幫手攞報紙入屋,無理由仲要開飯,又推返畀姊姊做,結果媽咪煮完飯出嚟,都唔知點做。

Mama好留心咁望住Agnes,諗住聽佢講埋個結局,點知Agnes話講完喇,篇reading就係用「媽咪唔知點做」來結尾。吓!唔係啩?究竟篇文章想帶出乜嘢信息呢?叫大家學習互相推搪?抑或做完一樣家務就唔需要做另一樣?還是學媽咪企喺到唔知點做呢?呢位史丹福大學教育學博士睇完都一頭霧水,更莫講係Mama啦。

Agnes又話,各科目嘅課本,都應該有基本核心道德價值,因為小朋友會喺閱讀過程中不知不覺咁吸收咗呢啲觀念,所以取材真係要好小心,千祈咪教壞細路!

[Happy PaMa 教得樂 138期]

相關字詞﹕每日明報-Happy Pa Ma