【明報專訊】近日實在太多唔開心嘅事情發生，搞到Mama都有啲唞唔過氣，其中教育局副局長蔡若蓮長子墮樓身亡事件，更引起全城關注，特別係教育界或者為人父母嘅反應就最大。作為人母，Mama非常感受到親人嘅悲慟，只希望逝者安息，留下嘅親人可以活得更堅強。
講開又講，呢幾年每遇着開學時間，都聽到有學童輕生嘅新聞。作為家長覺得呢啲新聞一單都嫌多，如果我哋一日唔改變學生要面對學業壓力嘅現實，呢啲情况就始終有可能出現。其實，我哋都有可以盡力去做嘅事，除咗培養囝囝囡囡有一顆樂觀面對人生嘅心，就係畀多啲時間關心佢哋，同埋留意住佢哋嘅情緒。
先兆：失眠無胃口 疏遠親友
Mama同青協親子衝突調解中心單位主任凌婉君姑娘傾過，了解一下年輕人如果一時之間「諗歪」，想做啲傷害自己嘅事，有無先兆可以畀家長察覺，等我哋及早預防悲劇發生？凌姑娘話，可以從以下四方面留意：
一、在言談間、或者社交平台如facebook及instagram直接或間接提及傷害自己或對死亡看法和話題；
二、將自己心愛嘅物品全部送贈畀人；
三、飲食、睡眠等生活習慣改變，例如提到自己失眠或者無胃口，甚至講到對返學感到絕望、有啲問題解決唔到等；
四、同親友關係疏離，例如拒絕朋友約會同見面。
毋須逃避死亡話題
凌姑娘話，如果家長發現青少年子女有上述情况，唔使驚，亦唔需要特登逃避死亡嘅話題，「因為如果佢哋有晒全盤計劃，家長愈聽得多，愈能夠了解青少年內心想法，更容易搵到幫助佢哋嘅辦法」。佢話最重要係搵機會，耐心聽吓青少年傾訴心事，表示明白並且接受佢哋嘅諗法先；然後回應「我哋可以幫你」、「同你一齊尋找解決方案」等等，有需要就可以搵學校社工支援，一齊渡過難關。Mama亦奉勸年輕一代凡事睇開啲，因為「辦法總比困難多」，有咩記得同身邊嘅人講，千祈唔好屈埋喺心吖！
[Happy PaMa 教得樂 第155期]
