【明報專訊】香港近來熱話，點少得特首林鄭月娥發表首份施政報告？新人事新作風，Mama都好關注有咩教育措施，佢上立法會朗讀報告重點嗰陣，Mama全程睇實直播呀。點知最爭議嘅，林鄭提都無提，大家要睇番份報告全文先搵到，認真神秘。講緊嘅係2018/19學年起，中國歷史將成為初中嘅獨立必修科，報告寫到明係為加強國情教育。
強制獨立成科 失教學彈性
雖然全港九成中學已經係中史獨立成科，但仍然有一成學校，將中史結合世界歷史、地理等科目，以綜合人文科嚟教；亦有學校喺初中三年，分別安排一年香港史、一年中史、一年世界史。呢啲學校勢必受影響，唔知前線教育工作者有咩心聲呢？
Mama即刻搵香港中學校長會主席李雪英傾吓，佢話下學年就開始新安排，老師要調節難免有啲急。當然，如果新措施對學生有益，老師都好樂意配合，問題係目前未有根據。「有無驗證過呢九成獨立成科嘅學校，中史係咪教得比其餘一成學校好呢？」
中史無獨立成科，唔代表學校忽視或者教得無系統。有學生專注讀中史，會覺得比較清晰；但亦有學生讀綜合科，有其他世界事件做背景，會比較易掌握，「校長會就中史獨立成必修科討論過，正正因為同學有不同特質，所以決定尊重各間學校嘅教學手法」。而且教育局曾經表明，接納歷史與文化科結合嘅做法，「我唔係話政府講過就唔改得，但要有客觀原因，無理據就好難說服學界」。
倡港獨青年都無讀中史？
至於林鄭話要加強國情教育，又係唔係充分原因呢？李雪英話，平心而論，透過教育培養公民意識、國家歸屬感，已經係世界潮流，做法無可厚非。但唔少學校已經有做相關活動，例如同內地學校交流等，未必要中史獨立成科先做到。
佢更加質疑，中史科同學生嘅國家觀念，有無明顯因果關係？「𠵱家有九成中學都獨立成科，照計如果中史科影響力咁大嘅話，應該就好夠愛國情懷。係唔係其餘一成學校嘅學生，特別多上街遊行、標榜港獨呢？暫時又無呢方面嘅數據。」
[Happy PaMa 教得樂 第160期]
