有話說﹕高小生關心長者大計 呼籲幫手

文章日期:2017年11月14日

【明報專訊】早個幾星期前,Mama走去數碼港湊熱鬧,皆因DreamStarter喺個度舉辦第二屆「DreamStarter Kids Pitching Day兒童夢想募資日」。DreamStarter鼓勵孩子發夢,提高孩子學習及解難能力,積極關心社會。Mama之所以認識呢個學習計劃,其實係因為浸信會天虹小學,佢哋係第一間推行DreamStarter嘅學校,而過去一年,小朋友嘅表現有目共睹。

踏入第二屆,參與嘅學校更多,除咗天虹之外,仲有聖保羅書院、香港培道小學、香海正覺蓮社佛教陳式宏學校,以及救世軍林拔中紀念學校,超過1000名學生發起超過100個夢想項目。

陪過節 影家庭照 倡長幼共融

當日好開心,碰上同Mama老友鬼鬼嘅培道小學葉詠欣老師,原來佢都帶住八個高小生,發起咗一個名為「耆幼趣BOOKBOOK」嘅夢想項目。葉老師話,呢班學生好乖,好想持續關心一班無親無顧嘅獨居長者,陪佢哋過時過節、影家庭照,畀呢班老人家覺得自己係有「孫仔孫女」愛惜嘅;同時,更希望向社會傳遞長幼共融嘅信息。

Mama知道,「耆幼趣BOOKBOOK」已率先獲得九龍城浸信會長者鄰舍中心支持,中心負責穿針引線,為同學仔配對咗八位老人家,今個星期五(17日)約埋第一次見面𠻹!「呢班學生好興奮、好期待,已經諗定自製一啲小禮物畀老人家。不過,如果要呢個項目運作順利,其實好需要社會人士支持。」葉老師舉例,12月5日已經計劃好帶八位長者去尖沙嘴一間烘焙店齊齊學整曲奇餅,但佢哋全部住黃大仙區,好多亦行動不便,所以,希望呼籲到有小型旅遊巴司機義載佢哋。

另外,同呢班老人家去影樓影一輯靚相,亦係「耆幼趣BOOKBOOK」嘅重點活動,葉老師猛咁叫Mama借出版面畀佢呼籲﹕「希望有影樓老闆支持一下呢班咁有heart嘅小朋友,借出地方兼服務,咁就very good了!」

想知多啲「耆幼趣BOOKBOOK」仲有乜搞作,可以瀏覽佢哋專頁﹕www.collaction.hk/s/elderlyfunbook

[Happy PaMa 教得樂 第164期]

相關字詞﹕每日明報-Happy Pa Ma