有話說﹕體察情緒警號 全繫一線關心

文章日期:2018年01月09日

【明報專訊】上星期,一放完聖誕新年假,就睇到好令人心痛嘅新聞,有兩名中學生輕生,都懷疑與學業壓力和情緒有關。𠵱家學生壓力大,幾乎人人都知,Mama聽香港青年協會全健思維中心單位主任吳錦娟講,機構旗下青少年輔導專線「關心一線」,單單喺去年9月開學至12月,3個月內已經處理咗超過2400宗有關校園生活嘅求助個案。

孩子拒返學有因 宜聆聽理解

雖然Mama一對囝囡都未踏入青少年階段,但都好唔想見到青少年失去生命,亦要學定兩招,知道點樣幫囝囡疏導壓力。吳錦娟教路,首先家長要夠敏銳,囝囡有異常狀况時要盡快察覺,「佢哋有無變得鬱鬱寡歡、容易失眠、拒絕返學、返學故意遲到?或者身體唔舒服,經常胃痛、肚痛或者頭痛,但睇醫生都搵唔出病因」。呢啲全部都係警號,代表囝囡好可能有負面情緒。

一旦發現異常情况,初步先鼓勵佢哋找方法紓緩,做吓運動、聽聽音樂等;家長同時要坦誠同囝囡傾,「可以問佢哋:『最近我觀察到你嘅行為,同以前有啲唔同喎,係咪發生咗啲咩事呀?』語氣盡量溫和,鼓勵佢哋講出煩惱」。聽完當然要接納,就算佢哋話唔想返學,都唔好一下子拒絕,「有家長驚囝囡真係逃學,好快就答『返學都無乜嘢啫,我返工咪仲辛苦』,佢哋會覺爸媽唔理解自己」。

跟住家長要主動表示支持,一齊同囝囡傾解決煩惱嘅方法,或者向社工、心理輔導等專業人士求助,「不論係嘗試搵解決嘅方法,定係搵他人協助,家長都要陪囝囡一齊去做,而唔係同完佢傾,就叫佢自己去面對。呢一點好緊要,讓佢哋喺困難面前,覺得唔再孤單」。

關心一線設立多年,專門提供情緒支援,唔單止青少年會打電話去傾訴心事,家長見到囝囡情緒低落,一時間唔識處理,都不妨打去商量。接聽電話嘅係社工,亦有少數受過輔導訓練嘅義工,相信可以為家長提供專業援助。

留意壓力高峰期

吳錦娟發現,青少年壓力有階段性,通常求助嘅高峰期,就係考試季節、放完長假後返學,或者即將考公開試,「臨近呢啲日子,家長唔使表現得好緊張,但可以默默地留意一下囝囡嘅狀况」。佢又提到,除咗學業之外,家庭同人際關係都係青少年常見煩惱來源,家長可以多加注意。

■青協青年支援服務

關心一線:2777 8899(周一至六,下午2:00至凌晨2:00)

網上輔導:utouch.hk、WhatsApp輔導:

6277 8899(周一至五,下午2:00至凌晨12:00)

[Happy PaMa 教得樂 第171期]

相關字詞﹕每日明報-Happy Pa Ma