【明報專訊】5歲女童懷疑被虐致死，人神共憤。直到呢一刻，Mama仍然覺得好心酸，一方面為失去小生命而難過，另一方面諗，佢哥哥姊姊點算呢？胞兄都被發現傷痕纍纍，而繼姊身處發生虐兒事件嘅家庭，Mama估計小小心靈都會受到傷害。
防止虐待兒童會署理總幹事黃翠玲都好認同Mama嘅想法，佢表示，不論係兄弟姊妹抑或父母被虐打，小朋友一旦目擊家庭暴力，內心都好可能留下陰影。「被打嘅人固然身心受傷，無被打嘅小朋友其實都承受緊心理虐待，會變得好無安全感，成日諗：會唔會有一日自己都被打呢？係咪我一唔乖，就會有同樣遭遇？」
對人失信任 有話無路訴
缺乏安全感所帶嚟嘅壞處，隨住成長會變得明顯。由於情緒負面，日常生活與學業都大受影響，而且對人欠缺信任，社交能力下降。同時佢哋會對家庭失去信心，「原本應該係保護自己嘅家人，竟然變成威脅所在」。最慘係鬱結無從排解，小朋友唔開心通常會向父母求助，如果父母本身就係施虐者，就變咗無人可以傾訴。
咁除咗聲討施虐者之外，社會各界仲可以做啲咩去幫助小朋友呢？黃翠玲話，如果發現親朋好友打囝囡，程度尚未去到好嚴重，可以勸喻對方，「好多時父母打囝囡都係出於管教，可以同佢哋講，打罵根本教唔好細路，反而會破壞關係。小朋友隨時學咗以暴易暴，或者講大話逃避責罰，絕對弊多於利」。
如果屢勸不改，或者同施虐者唔相熟而無法勸喻嘅話，則建議舉報。以防止虐待兒童會為例，佢哋會將舉報者身分保密，並由專業社工去家訪，了解家長有無管教困難，建議正確教養方法。至於目擊嘅小朋友，社工會透過心理輔導、遊戲治療等，引導佢哋表達感受，以及重建同父母嘅關係。
黃翠玲鼓勵大家，可以留意身邊家庭有無虐兒情况，但唔好見到「重組家庭」（父母離婚後再建立新家庭）就認定有虐兒傾向，「去年防止虐待兒童會嘅熱線收到1121宗求助，其中有198宗係懷疑虐兒個案，唔少懷疑施虐者都係親生父母或者祖父母，可見唔係繼父母特別易施虐」。不過重組家庭的確面對困難，好多生活習慣、溝通模式都要適應，佢希望政府增加支援，例如重組前嘅輔導服務、家長教育課程等，幫助重組家庭建立融洽關係。
[Happy PaMa 教得樂 第173期]
