有話說﹕Peppa Pig咬死爸爸? 遠離網上邪惡

文章日期:2018年01月30日

【明報專訊】問起2月有咩特別日子,小朋友會答農曆新年,大人就答情人節,其實仲有一日都好值得留意㗎,就係「國際互聯網安全日」!歐洲非牟利機構Internet Safety(InSafe)每年都會將2月其中一日訂為國際互聯網安全日,今年定咗喺2月6日,世界各地嘅機構、學校都會搞活動,向兒童同青少年宣揚安全使用網絡嘅信息。

隨住網絡發達,互聯網安全愈嚟愈重要,上載喺網站、社交平台嘅內容適唔適合兒童呢?家長要多加注意。好似有次囝囝睇睇吓片,突然問:點解Peppa Pig要殺爸爸?Mama當堂嚇一跳!追問落去先知,囝囝本身想睇普通卡通,點知誤按咗一段二次創作嘅卡通片,故事講述Peppa Pig咬死爸爸,畫面仲好血腥添。

Mama再撳入其他短片,發現有好多得人驚嘅畫面,例如Peppa Pig自殘、米妮剪走米奇老鼠隻耳仔等等。呢啲短片以小朋友熟悉嘅卡通人物做主角,頭幾分鐘係正常情節,再睇落去先有色情、暴力信息。

聽香港家庭福利會註冊社工吳浩希講,除咗影片之外,近年仲有大受歡迎嘅網絡紅人,小朋友會追睇佢哋嘅頻道,每晚坐定定等睇直播,但佢哋會喺鏡頭面前講粗口、成人笑話等等。嘩!咁咪防不勝防囉!家長應該點做,避免小朋友吸收不良資訊呢?

吳浩希按不同年齡層,提出咗幾項建議。對於幼兒、初小嘅小朋友,家長應該諗清楚係咪要畀佢哋有電子產品,「佢哋未有足夠判斷能力,如果亂撳入網站或者睇咗內容不當嘅片,無可避免有負面影響」。就算畀佢哋上網,都要有家長陪同,萬一有不良資訊彈出都可以及時制止。

到咗高小,就係時候培養獨立思考能力,家長平時喺通訊群組收到圖片,不妨拎出嚟同小朋友一齊討論:圖片內容恰唔恰當?應該點回覆或者處理?教佢哋分辨資訊好壞。再深入啲,可以討論關於互聯網嘅新聞。以俄羅斯網上遊戲「藍鯨」(Blue Whale)為例,呢個遊戲要求玩家完成任務,包括自殘同自殺,令俄羅斯有過百青少年輕生,「親子一齊睇番段新聞,再討論網上資訊嘅影響、有害定有益」,等佢哋上網時有意識,唔好盲目吸收所有資訊。

健康上網支援網絡

(周一至六,上午9:30至晚上9:30)

熱線電話:2922 9222

WhatsApp:5592 7474

[Happy PaMa 教得樂 第175期]

明報影片