【明報專訊】近期有幾間學校爆發流感，搞到Mama好驚，即刻叫囝囡返學要戴番個口罩。不過我老公每年都會捉晒成家去打流感針，所以即使係流感高峰期，我個心都定少少。
但身邊啲家長老死就好擔心，屋企豆丁有少少燒就帶去急症室。佢哋話唔識分流感同感冒，咁不如直接去急症室，畀醫生檢測最安全。Mama醒起有次活動，認識咗中大兒科學系教授韓錦倫，即刻打畀佢，問吓流感同感冒有咩分別？
韓教授就話，其實流感大致上劃分甲、乙、丙型流感。患者多數會突然發高燒，差唔多攝氏38.5度或以上，仲會周身骨痛，食咗藥，飲多啲水，瞓多啲覺，2至3日多數會好番。而感冒患者，好多時都會低燒、咳嗽與流鼻水，因應不同嘅病毒感染，低燒會持續一段時間。
但Mama喺新聞聽到，感染流感好危險！韓教授就叫大家冷靜啲。1至2月係流感高峰期，好多醫生建議一有唔舒服就去求醫，然後食藥休息；但有好多家長就選擇去急症室，等成8個鐘，拖延咗診症食藥休息時間，反而令病情惡化。睇嚟Mama都要提醒吓班老死，唔好濫用急症室服務啦。
預防勝於治療，我問韓教授，有咩方法預防流感？佢話打流感預防針，就係唯一有科學根據嘅預防方法。有啲家長覺得打完針會發燒唔舒服，但其實咁樣代表疫苗開始起作用，建立流感抗體，所以家長唔好太過緊張。身體比較虛弱的小朋友同長者，就最好去打流感針啦。
韓教授又建議每年11月就應該打預防針，幫身體預備定抗體。如果家長想係流感高峰期時先打針，就要有心理準備，打完兩星期先開始見效，大家要注意啦！
[Happy PaMa 教得樂 第176期]
