【明報專訊】Mama由細到大，阿媽成日講「書中自有黃金屋」，要睇多啲書先可以識多啲嘢。Mama做咗人阿媽，都想鼓勵下囝囡閱讀，但就好頭痕，唔知點入手。早前Mama就去咗兩年一度嘅「學校圖書館主任卓越成就獎頒獎禮*」，順便參觀秀茂坪天主教小學圖書館，真係大開眼界。
參觀就由該校圖書館主任黃俊安老師帶團，圖書館唔算好大，但學生閱讀風氣好強烈，原來黃老師好識得設計唔同閱讀嘅活動畀學生參加，好似有每月閱讀明星、伴讀活動、晨讀活動，仲喺某啲樓層有漂書活動等，令到全校學生都好鍾意睇書。Mama就問黃老師點解咁成功，可以令到閱讀氣氛咁熱烈？佢就話要將閱讀融入生活，令學生知道閱讀係生活必需品，好似安排圖書館同唔同學科合作，每個月有不同主題嘅學科周，老師會要求學生到圖書館借閱相關圖書。另外，平時學校其他範圍都有閱讀位置，差唔多做到學生隨手就可以拎到書嚟睇。小息時學校三部大電視會播放唔同故事短片，從而引起學生嘅閱讀興趣。黃老師又會設計有趣活動，鼓勵學生睇書，特別係每個月嘅閱讀明星，如果借書同睇書次數較多嘅同學，就會成為閱讀明星，佢會邀請嗰個同學，一齊拍短片，用有趣嘅方法，同其他同學分享一本書。黃老師發現好多同學都會好落力做「明星」，因為可以玩嘛。佢仲即刻分享一條閱讀明星嘅短片，同學扭盡六壬，好有趣咁分享咗一本關於科學嘅書，搞到Mama都覺得本書好好睇，即刻寫低書名，搵機會借番屋企畀囝囡睇。
飲食皆可的教大圖書館
參觀完圖書館，Mama仲參加埋頒獎禮，呢個頒獎禮兩年舉辦一次，表揚各間中小學表現出色嘅圖書館主任。嘉賓之一嘅香港教育大學圖書館長鄭保瑛，分享設計教大圖書館嘅心得。Mama發現鄭博士嘅思維都幾前衛，從前圖書館一定唔畀飲食同「hea」，每個學生入到圖書館就一定要安靜，但教大嘅圖書館有唔同嘅休息區，又有咖啡機，仲有區域畀學生傾偈同玩，成個氣氛都好好，所以教大圖書館嘅使用率都幾高。鄭博士就話，如果將一個圖書館設計得舒適，借書服務完善，學生就會願意去圖書館，甚至覺得係生活嘅一部分，自然會有種氛圍驅使佢哋去借書同睇書。聽完鄭博士分享，又同黃老師傾完偈，Mama先發現原來𠵱家學校圖書館嘅發展已經咁完善，原來培養小朋友閱讀興趣都好簡單，最重要就係識得將閱讀融入生活。
（*註：頒獎典禮活動名稱為「國際學校圖書館學會暨香港學校圖書館主任協會．學校圖書館主任卓越成就獎頒獎禮 」）
[Happy PaMa 教得樂 第177期]
