【明報專訊】今年過節見到唔少親朋好友，唯獨見唔到讀高中嘅侄仔，好奇問吓佢阿媽，先醒起佢今年中六，要為文憑試最後衝刺，所以新年都無乜出門。侄仔自細成績好好，一心想摘幾粒星，考入心儀學系，Mama梗係會為佢打氣啦！不過，唔係個個都咁有讀書天分，Mama諗起一啲學習能力唔高、甚至有特殊學習需要（SEN）嘅學生，係咪注定同摘星無緣呢？
發掘SEN童學科外才能
正當Mama咁諗之際，救世軍社會服務部就成立咗「不一樣的5**學院」，主力發展SEN小朋友嘅才能，包括音樂、空間、肢體動覺、人際、內省、自然、語文同數學邏輯，合共「八大智能」。
以肢體動覺智能為例，學院安排咗教練，指導一班SEN小朋友踩單輪車。經過訓練，個個學員都保持到平衡，踩到直線又轉到彎，真係好犀利！練成一技之長之後，學院仲會聯絡唔同團體，為佢哋爭取表演機會。
好似早排學院搞咗才藝薈萃，Mama都有去捧場，表演節目好豐富，除咗單輪車之外，仲有雜耍、話劇、非洲鼓、古箏、Hip hop舞等等，真心覺得呢班細路好鬼勁。SEN小朋友有機會接受掌聲，建立自信，都稱得上「摘星」吖！
當日壓軸演出嘅係香港花式單車前代表盧廷軒，佢將單車向前踩、向後踩、單轆行都絕無難度，睇到全場拍爛手掌。點解學院會安排佢嚟表演呢？原因係佢細個讀書成績都好差，但就慶幸搵到花式單車呢門技能，9歲入選青年軍，之後代表香港出賽，仲破過亞洲紀錄。
盧廷軒向Mama分享佢破亞洲紀錄嘅故事，原來佢當時剛喺德國完成訓練，大家都對佢抱好大期望，點知佢第一場比賽就失手輸咗，「嗰晚我好傷心，覺得練完返嚟都冇進步，但我好快調整心態，結果第二日就破埋亞洲紀錄」。佢想鼓勵SEN小朋友，不論學業或者發展興趣，都可能遇上挫折，最緊要堅持同相信自己。
佢仲話，得到好成績，一定要多謝父母，不單止無執著喺佢嘅學業成績，反而放手畀佢發展興趣。「我一話想學，佢哋就幫我搵花式單車訓練，我嘅自信亦建立起嚟。希望各位父母，尤其SEN學童嘅父母，都可以發掘到囝囡嘅才華，多啲欣賞佢哋！」
[Happy PaMa 教得樂 第179期]
