有話說﹕孩子最想要的是免費門票嗎?

文章日期:2018年03月06日

【明報專訊】呢個星期大家熱烈討論嘅話題,當然係財爺陳茂波嘅《財政預算案》啦!Mama作為一個師奶,最關心當然係有關家庭生活需要同教育政策,例如增加子女基本及額外免稅額,由現時10萬元增至12萬元;建議未來5年增撥2億元畀全港公共圖書館,向兒童及家庭推廣閱讀等等,聽落都好似唔錯。

過千中小學 1萬張票點分?

預算案仲有好多要點,但Mama想講一個比較多人討論嘅內容,就係財爺撥款3.1億元支持海洋公園發展教育旅遊項目,未來一年仲會向本地中小學生提供1萬張免費入場券。呢個項目畀屋企兩隻馬騮仔聽到,一定好興奮,但係諗真啲,一間小學閒閒哋都有成千個學生,香港有超過1000間中小學,1萬張入場券送畀邊個好?

志願機構可申請免費票

Mama早兩日見到有社工喺社交媒體發文,話近年都成日有免費海洋公園門票,畀佢哋帶基層學生去玩,仲話呢啲小朋友已經去到唔想再去;反而小朋友係想爸媽少啲OT,陪自己落樓下公園玩。

到底呢個情况係咪真呢?Mama問過大埔浸信會社會服務處助理社會服務協調主任周惠雯(Polly),佢話其實志願機構的確有門徑去申請主題公園門票,當然申請要詳細講明受惠對象同受某啲條件限制,而申請次數亦唔能夠過於頻密。Polly認為1萬張飛的確唔知用咩方法分配,如果學生咁好彩得到,父母又負擔唔起,唔通又要志願機構幫手申請埋父母嘅入場券?

爸媽多陪伴 去邊都開心

有做駐校社工服務嘅Polly接觸唔少學生,佢話以小學生嚟講,其實好多時只係想父母可以多啲陪佢哋,唔一定要去主題公園,「一家人一齊周圍去周圍玩,探索下新事物,例如參觀展覽館、搭船入長洲,對成家人嚟講已經係一件好開心嘅事」。Mama絕對認同,而且唔使等財爺派錢,大家都可以隨時實行,今個周末一於全家出去玩下先!

[Happy PaMa 教得樂 第180期]

相關字詞﹕每日明報-Happy Pa Ma