有話說﹕遊玩互動設施 學做守禮小乘客

文章日期:2018年3月20日

【明報專訊】大家每日返工放工搭港鐵,係咪都會變身低頭族或大覺瞓,不問世事?之但係Mama就好鍾意睇吓周圍嘅人做緊咩,有時真係好睇過電視劇!事關車廂同月台就好似社會縮影,有人喺車門臨閂一刻出手擋門,又有人等車時唔排隊扮傻企正喺幕門前面,呢啲人真係要出聲指正吓!

不過乘客行為又唔係一面倒咁差,Mama亦見過唔少有禮貌嘅乘客。有一次見到個6、7歲嘅小朋友主動讓座畀老婆婆,婆婆讚佢乖,仲同佢傾咗好耐偈𠻹!所謂三歲定八十,Mama認為應該從小教導小朋友做個有禮貌同顧及安全嘅乖乖乘客。

之前阿仔喺學校拎咗一套《港鐵沿途有禮》桌上遊戲返屋企玩,係由社企「樂在棋中」同港鐵推出,免費派畀小學生,寓學習於娛樂。最近佢哋再度合作,喺機場快線青衣站U2層推出一個以《港鐵沿途有禮》桌遊為設計靈感嘅「港鐵安全體驗天地」。Mama去過,見到現場有好多得意大型擺設,例如各種卡通紙板,考吓大家有咩嘢係唔帶得入港鐵站;又有一幅巨型3D圖畫,一齊諗吓搭扶手電梯時應該企喺咩位置。大家仲可以搵到成日亂衝亂撞嘅小雞「淘淘」,佢有好多錯誤示範,等小朋友教佢變乖!呢啲互動遊戲全部都係教小朋友乘搭港鐵嘅安全要點。

免費體驗活動學安全守則

Mama喺開幕禮當日,見到樂在棋中社會企業創辦人黃頌行(Thomas),佢話呢啲互動體驗設施係由桌上遊戲演化出嚟,同時亦有一個體驗館,小朋友喺裏面以手工、畫畫等遊戲認識搭港鐵嘅安全守則,而呢個體驗活動仲係免費!不過就只限團體預約參加,20人成團,每次活動為時約60至90分鐘,樂在棋中嘅導師會帶領參觀同玩遊戲,歡迎學校同機構組團參與。不妨到www.pob.hk/safetyzone了解多啲啦!

[Happy PaMa 教得樂 第182期]

明報影片