【明報專訊】今時今日相機食先嘅年代，大家為呃like可以去到幾盡？小朋友生日會，家長們選購嘅蛋糕，已經唔能夠只用一個「靚」字去形容，直情要令所有在場人士大叫「嘩！嘩！嘩！」先算有氣派。
之不過最近有家長在網上帖文，話小朋友食咗一個藍色造型蛋糕後，連大便都變成藍色，十分擔心。不過啲網民留言回應話「食得就預咗啦！」好似唔覺得有問題。講真Mama都曾經為阿女訂做一個造型好鬼靚嘅立體生日蛋糕，蛋糕上公仔有黑色頭髮，食完個嘴黑掹掹，問左整餅師傅話係竹炭粉，咁你話又有冇問題呢？
五顏六色的蛋糕，相信大部分都係人造色素，究竟係咪要敬而遠之？Mama即刻請教一下老友嘉璐（Carol Lam），佢曾經喺法國藍帶廚藝學院修讀法國菜及法國甜品課程，又成日花心思煮得意飯盒畀佢個寶貝女。嘉璐話，自己親手整嘢食，知道用咩材料最好！色素之中，有一種叫天然色素，主要由植物中提取，例如芋頭嘅紫色、紅菜頭嘅紅色等等，佢整蛋糕多數會用呢啲天然原材料製成嘅色素。但因為係天然色素，的確係較難做到好深色好鮮艷嘅效果。相比之下，化學色素做嘅蛋糕，顏色可以好鮮艷，十分搶眼，受歡迎都無可厚非，「喺我角度，食少少唔會有好大問題，始終都係可食用的色素；但最重要唔好大量食；同埋食蛋糕時，家長撥開糖皮、色素部分，唔好畀小朋友食咁多」。
嘉璐話好多天然食物都可以做到色彩繽紛嘅蛋糕，「你試下拎住紅桑子一陣，隻手會被染紅，花小小心思就可以用嚟整紅色嘅嘢食！」又或者將唔同顏色嘅水果左拼右拼，都已經可以做到一個好靚嘅蛋糕。好啦，Mama記住呢個貼士，下次都試下DIY畀兩隻馬騮仔先！
[Happy PaMa 教得樂 第183期]
