【明報專訊】復活節過咗，Mama嗰兩個豆丁話要應節，要食大餐，又要去呢度嗰度玩。見佢哋興高采烈，又可以享受下天倫之樂，即管順下佢哋意！不過有一件事，就唔可以咁順攤喇，就係佢哋見到好多得意兔仔後，心郁郁話要養，仲想即刻去買！
世界各地一到復活節，就出現買兔熱潮，但好多人之後發現照顧唔嚟，唔到半年就棄養。Mama早幾日睇新聞見到，英國一個寵物供應商決定今年復活節唔賣兔，反而舉辦養兔工作坊，向大眾教授養兔嘅責任，得到超過440間寵物店響應。
外國有行動去避免棄兔潮，香港又點呢？香港兔友協會（下稱兔協）專門為兔仔謀福利，收養被遺棄嘅兔仔，Mama就向會長唐雅賢請教一下。佢話近年兔協同政府都有教育市民，唔好為應節買兔，或將兔仔當作禮物，所以節日後棄兔嘅情况減少。但仍有人棄養，原因之一係兔仔有病，另一個原因係屋企有人懷孕或生咗BB，驚兔仔影響孕婦同BB健康，或者兔毛引起敏感。
勤梳毛 遠離兔毛敏感
唔通有小朋友等於要棄兔？唐雅賢澄清呢個誤解，養開兔嘅人懷孕後，的確有可能因為荷爾蒙分泌改變，出現兔毛敏感；而BB免疫系統未成熟，亦容易對兔毛敏感，導致皮膚痕癢。但佢強調，只要做足預防措施就唔使怕，「兔毛比較幼同輕，甩咗會亂飄，但只要每日幫兔仔梳毛，就可以避免呢個情况」。
至於同兔仔相處，唐雅賢建議，家長要提醒小朋友不要太大力觸摸或攬抱，因為會嚇怕兔仔，「兔仔冇乜反擊能力，淨係識逃走，最多咬一咬人。如果受驚後，又畀人好大力捉住或者扯毛，佢哋會掙扎，試過有兔仔從高處跌落地骨折」。
嘩！養兔有唔少學問，家長同小朋友都唔好一時興起，就買寵物返屋企！
[Happy PaMa 教得樂 第184期]
