有話說﹕「愚人節定情人節較適合表白」?

文章日期:2018年04月17日

【明報專訊】有晚一家人傾偈,阿囝突然問:「你哋覺得愚人節定係情人節,比較適合表白呀?」吓?突然咁問,唔通阿囝人細鬼大,有少男心事?緊係要打爛沙盆璺到篤,原來係一條辯論題目嚟。講緊當然唔係傳統嘅校際辯論比賽,而係一年一度嘅奇趣盃。

熱話為題 玩轉辯論比賽

經佢提一提,Mama醒起,呢個比賽自2012年起,由寶血會上智英文書院中文辯論隊舉辦,今年已經第7屆。上年有24間學校派隊參加,今年增至32隊。上屆辯題「譚仔應聘請粵語發音純正的員工」、「多啦A夢對大雄的成長利多於弊」,十分出格,今屆就同城中熱話息息相關。

早排好多人撲飛,想睇黃子華嘅棟篤笑,於是就有一條辯題討論黃子華應該以拍戲定棟篤笑為重心。

仲有最近喺社交平台洗版嘅佛系圖,Mama睇完得啖笑,奇趣盃籌委就有諗頭得多,設計成為「佛系應作為香港人的生活態度」嘅辯題。

激辯佛系 點出思考新角度

至於時事題目,就有「港府派發迪士尼門票比海洋公園門票更好」、「特朗普比金正恩更適合成為香港特首」等。扣連到新聞之餘,又帶出新嘅思考角度,到底係咩奇人異士諗出嚟呢?

中學生當家 出題定賽制

原來,奇趣盃籌委由中三至中五學生組成,大家各自諗題目,再逐一討論。賽制方面,一般校際辯論比賽係淘汰制,輸咗就出局。但喺奇趣盃就分8個小組,每隊出戰3場初賽,每組最高分嘅隊伍出線八強後,先實行淘汰制。

加入分組賽 歡迎初中生

籌委之一嘅陳若楠話,賽制嘅設定同奇賽盃理念有關,「大型辯論比賽,學校通常派出高中代表。我哋希望奇賽盃係一個平台,畀初中生都可以出外參賽。如果一場就出局,意義都唔大,所以決定每隊至少參加到3場」。

咁好玩又有意思,真係好值得支持呀!嚟緊4月29日同5月13日初賽,大家不妨去觀戰,時間、地點等資訊,可以留意「第七屆奇趣盃」Facebook專頁。

[Happy PaMa 教得樂 第186期]

相關字詞﹕每日明報-Happy Pa Ma