【明報專訊】早前，立法會教育事務委員會討論校園性騷擾，議員認為性教育有需要改善。民建聯劉國勳擔心教師唔識教性教育，理由是「可能有啲老師未拍過拖，無經驗，咁佢又點去教呢？」劉議員知道乜嘢叫做性教育否？如果照劉議員的意思，性教育即是性知識，是有過性經驗的人才可以教；再演繹下去，拍拖=性經驗。媽媽咪吖！請劉議員先將個腦洗白白，睇完《學校性教育指引》才亂發噏風。議員水平如此低B，吐血三斗都嫌少。
香港性教育起步甚遲，大約是1983年，第一個提議在學校推行性教育的是前拔萃女書院校長西門士夫人。她是一位有遠見的教育家，由於社會保守，學校反應冷淡，沒有學校敢跨出第一步。潮流影響，外國學校多設性教育課程，香港學校逐漸明白，不能再忌諱及逃避，性教育遂以滲透方式分別在常識或生物科進行，直至1997年香港課程發展議會正式公布《學校性教育指引》。王師奶讀小學五年級時，全無性教育這概念，但校長卻請了香港家庭計劃指導會一位講者對同學們講性教育。這位講者將男女生分開，當女生講座時，同學們好緊張，好奇兼期待。五年級時約十一歲，當然不相信老媽話BB係石頭爆出來的謊話，但一切似懂非懂。此後學校安排每月一次類似講座，由校內老師負責。女生講座由班主任Miss方擔任，Miss方好年輕，有無拍過拖無人知，但講得非常好，不單灌輸生理衛生知識，也教我們和異性相處的正確態度。十一歲人，對男女關係如煙若霧，晚晚電視餸飯，總會見到男女恩怨情仇的場面，兄弟姊妹嘻哈大笑，各有領會；父母欣賞埋一份，偶爾品評一兩句，但不會有指引性的教導。Miss方有一段話至今難忘，她說：「世界有男人、女人，將來妳們可能會愛上一個男人，愛是好自然的事，但不是隨便的事。隨着愛而來的是信任、責任，而不是放任；男女相處是坦誠、忠誠，而非不誠。」這幾句話王師奶刻骨銘心，經常用來提醒兒女。
指引認真全面 方向清晰明確
1997年香港課程發展議會發布的《學校性教育指引》，經歷得起時間考驗，方向清晰明確，它將性教育分為3個領域：知識、價值與態度、技巧（溝通技巧、解決問題技巧、取決技巧）。範疇及目標分5個方向：人的成長、健康與行為、人際關係、婚姻與家庭、社會與文化。詳細列出學前教育、小學、初中和高中教授內容。小婦人認為是一份認真、全面的指引。
黃碧雲質問教育當局「到底知唔知學校教啲乜？」李慧琼及劉國勳謂《指引》經歷21年，已經過時。王師奶好少撐教育局，今次真係要主持公道。21年不算短，有啲嘢一年半載就out，有啲嘢歷久常新，不要以為21年就一定變古董。小婦人懷疑話指引過時的人睇過這本約70頁的《指引》未？如果睇過就請指出哪些資料過時，開開小婦人茅塞，如果未睇過就請shut up。黃碧雲議員，不要因為突發的校園風化案就入晒性教育事，妳問教育局「到底知唔知學校教啲乜？」，教育局梗係知道學校教緊乜喇，他們就是跟指引教囉！教育局唔知，難道妳知乎？教而化之，政而令之，教是盡力而為，化唔化係牽涉好多因素㗎。
立法會有好多有深度的議員，但有更多又懶又自以為是的議員，好心做下功課喇！
作者簡介：不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟
文：王師奶 wongszelai@yahoo.com.hk
[Happy PaMa 教得樂 第186期]
