有話說﹕小學雞音樂劇 局長都捧場

文章日期:2018年4月24日

【明報專訊】Mama上星期睇咗一部好特別嘅音樂劇,並唔係由專業劇團演出,而係由馬鞍山靈糧小學270個小學生合演嘅The Blessings。

盈利捐慈善機構添意義

個劇有咩咁特別?等Mama先賣個關子。呢次演出係學校25周年銀禧校慶慈善英語音樂劇,5年前,佢哋同樣演出過大型音樂劇,今次係第二次「踩台」。門票費用扣除開支後,會捐畀「黑暗中對話(香港)基金會」,真係好有意義。

服裝演技見孩子心思

講番套劇嘅利害之處,Mama都睇過唔少本地兒童劇,但呢次演出無論佈景、服裝都媲美專業劇團,尤其係以森林做背景一場,各小演員喺服裝同演出所花嘅心思,真係令觀眾拍爛手掌!幾個主角唔止英文流暢,唱歌仲好好聽呢!首演當晚,政務司長張建宗、教育局長楊潤雄都有嚟捧場,張建宗致辭時仲話好少可兩人會一齊出現,可見呢件的確係教育界盛事。

英劇練語文 排戲學忍耐

馬鞍山靈糧小學校長陳美娟同Mama講,演英語音樂劇並唔係要培訓專業演員,而係想學生喺英語方面有所得着,並且從排練中學習忍耐、接受批評。作為一間津貼小學,要做咁大型嘅演出當然唔容易,陳美娟話其實要做好呢件事,並唔係基於有幾多錢去做,而係有無心去做,所以希望大家多啲支持同鼓勵呢類型演出。

校長作曲填詞出CD

劇中所有演出歌曲,都係由校長親自作曲填詞㗎!Mama知道佢兩年前就開始構思劇本,今次更加推出一隻收錄劇中歌曲嘅CD,點解有咁嘅idea呢?「製作人聽過啲歌,覺得好好聽,所以有呢個建議,而我都覺得係一個保存小朋友可愛童聲嘅好機會。」做校長除咗管理校政,仲要咁多才多藝兼滿腦點子,Mama不得不佩服佢!

[Happy PaMa 教得樂 第187期]

明報影片