有話說﹕學做喜閱小精靈 為長者說書

文章日期:2018年05月01日

【明報專訊】為鼓勵一對囝囡睇書,Mama經常絞盡腦汁,同班師奶朋友傾起,佢哋教Mama向新地新閱會取經。今年係新閱會成立5周年,有一連串慶祝活動推動閱讀。專為兒童而設嘅「喜閱跨世代」,由新閱會同安徒生會合辦,一班小朋友接受訓練,學習演繹繪本故事,然後化身「喜閱精靈」,到社區向長者講故事。

小朋友受訓 學溝通尊重

要轉換角色做說書人,一班細路搞唔搞得掂㗎?安徒生會總幹事黃美坤好有信心,事關安徒生會一向有為小朋友提供訓練,入學校去同同齡學生分享繪本,參加者即使年紀小小,一樣將故事表達得吸引有趣。

今次對象變成長者,難度好似提升咗,但黃美坤認為,長者見到小朋友肯定好開心,「老人家愛惜小朋友,小朋友尊重長者,跨代之間就能夠建立好氣氛」。當然,事前訓練裏面,小朋友會學習同長者溝通嘅技巧,例如說話速度要放慢、聲量要比平日大,方便聽力欠佳嘅老人家。

細心選讀本 兩代同學習

揀選繪本時,要符合長者口味,而長者通常就鍾意經典故事或溫情繪本。

黃美坤推介《想不到……》,由本地作家張佩斯撰寫,講述一條小村莊停電,每個家庭都點起蠟燭,維持日常生活之餘,仲用蠟燭為村中一名獨居長者製造生日驚喜,溫馨嘅故事好適合長者細味,「同時小朋友會明白,即使個人力量微小,都能夠發光發亮」。

黃美坤補充,今時今日閱讀習慣已經好唔同,「睇書唔一定係紙本,小朋友可以教長者用電子平台、手提電話睇書」。

教長者電子閱讀 延伸玩樂

除此之外,仲可以配合故事內容,小朋友同公公婆婆一齊做小手工、製作食物等等,「閱讀變得好多元化同生動,總之抱住好玩嘅心態,小朋友好易會愛上閱讀」。

本地文學遊 跨媒介分享

除咗「喜閱跨世代」,新閱會仲有其他慶祝活動,例如「喜閱香港故事」提供3條具文學氣息嘅本地遊路線,畀大家一邊行,一邊感受作家筆下嘅地方風貌;「我的喜閱片段」就鼓勵大家拍短片,表達閱讀嘅樂趣。想知道各項活動詳情,可留意新閱會網站www.shkpreadingclub.com

[Happy PaMa 教得樂 第188期]

相關字詞﹕每日明報-Happy Pa Ma