【明報專訊】了解運算思維
在電腦應用愈嚟愈普遍嘅年代，小朋友除咗要識打字、上網，老師都會教如何分辨網絡資訊真偽同保護個人資料。教育局自2000年以來，開發咗八個電腦認知單元課程畀學校使用，當中包括基礎編程單元（簡稱編程），建議小四至小六引入編程教育，所以唔少學校都緊貼潮流，教學生編程，學習運用電腦語言操控機械人或者寫程式（App）。就好似浸信會天虹小學，小四至小六都會上「運算思維課」，學習點樣用科技解決生活問題。
一向致力推動STEM嘅朱子穎校長，最近就向Mama介紹一個同編程有關嘅活動「編程嘉年華@香港教育大學」，集玩樂與學習於一身，由賽馬會運算思維教育（CoolThink@JC）策劃，香港教育大學、美國麻省理工學院及香港城市大學聯合策動。透過一系列工作坊、家長講座同攤位展覽，畀參加者體驗及了解運算思維、編程同STEM。運算思維重視提出問題，並利用編程的相關技巧來解決問題，可以培養小朋友解難能力同啟發數碼創意，呢啲都係數碼年代不可或缺嘅能力。
參加工作坊 送微型電腦
活動將於父親節嘅周末舉行，朱校長提醒Mama已經開始接受報名，想參加就要快啲入去www.codingfair.com/registration登記。為鼓勵家長及小朋友喺活動後繼續學習編程，大會將送出1200塊micro:bit編程微型電腦，只要參加編程工作坊、家長講座同STEM工作坊各一節，即可換領。當日仲有充氣彈牀、迷宮、模型車等小朋友最鍾意嘅玩意，想同爸爸過一個有趣嘅父親節就唔好錯過啦！
■編程嘉年華
日期：6月16及17日（周六及日）
時間：上午10:00至下午5:00
地點：大埔露屏路10號香港教育大學
對象：公眾（歡迎家長或監護人陪同4至12歲小朋友參與）
[Happy PaMa 教得樂 第190期]
