【明報專訊】呢排天氣酷熱，周末放假，都想匿埋喺冷氣地方，點知有日經過尖沙嘴文化中心露天廣場，見到一大班人表演非洲鼓，大汗疊細汗都堅持演出。Mama同一對豆丁都好佩服，駐足支持！
破健力士世界紀錄
望真先發現，近千人表演者當中，有約二百名唐氏綜合症人士，佢哋聯同義工、導師等合奏咗6分7秒，成功刷新最大規模非洲手鼓合奏健力士世界紀錄！破紀錄都係其次，呢個由香港中區扶輪社、香港非洲鼓樂文化總會主辦嘅活動，名叫「我和唐寶寶有個約會」，主要目的係增加社會關注唐氏綜合症，達至社會共融。
參與嘅「唐寶寶」有兒童、青少年同成年人，佢哋演出時不但拍子準，跳簡單舞步時全部都好「到位」同合拍。聽香港唐氏綜合症協會籌款及公共關係主任謝嘉慧講，大部分唐氏綜合症患者對音樂好敏感，掌握節拍嘅能力好高，「音樂係一個好好嘅媒介，去發揮佢哋嘅才能，而非洲鼓展現方式特別熱情，令佢哋更加開心同放鬆」。
打非洲鼓講求合作
由構思到正式演出，足足用咗過半年時間，唐寶寶要上堂接受非洲鼓訓練、記舞蹈動作，再作幾次大型綵排，「過程中有機會上台，甚至接受掌聲，佢哋嘅自信心大大增強，有助改善行為同談吐」。
同一時間，一齊學非洲鼓嘅義工對唐寶寶留下深刻印象，「試過有一個唐寶寶主動講：『我哋打非洲鼓，唔可以一味自己打，仲要講求合作㗎』，令義工明白到，佢哋唔止係被照顧嘅一群，而係有能力，亦願意與人互動」。除咗一次性演出外，謝嘉慧表示，協會有舉辦恆常班，教唐寶寶非洲鼓、話劇等，希望將藝術帶嚟嘅益處，一直延續落去。
除咗發展藝術，對唐寶寶嚟講，另一個重點發展範疇係體育，「好多唐寶寶鍾意郁嚟郁去，所以要佢哋投入運動都唔困難，協會亦會搞體育班，例如跳舞、游水等」。佢哋不但玩得開心，更重要係強身健體，事關唐氏綜合症患者會較早進入老齡化，「運動嘅重要性在於增強身體能力，防止身體機能迅速退化」。
[Happy PaMa 教得樂 第193期]
