有話說﹕親子賣旗 照亮SEN家庭

文章日期:2018年06月12日

【明報專訊】周末賣旗,一對囝囡樂於用自己零用錢去買,Mama發現𠵱家啲旗仔愈嚟愈精美,今個月30號,大埔浸信會社會服務處將會舉行「愛•在家」賣旗日,旗仔就有一式16款,以燈炮為形狀,配上「愛」、「關懷」、「和平」等字句。

咁特別嘅設計,背後有咩含義呢?機構嘅社會服務協調主任吳健文(文Sir)話,今次籌得嘅善款,主要會用嚟幫助有特殊教育需要學童同家庭,用上燈泡圖案,代表每買一支旗,都照亮緊SEN家庭。

字詞出自讀寫障礙童手筆

而旗上16個字詞,都出自讀寫障礙兒童嘅手筆,「一眼望上去以為係『娃娃體』,其實係佢哋寫字東歪西倒。機構刻意唔作修整,最直接將作品呈現」。

文Sir透露,機構喺2013年設立兒童學習及發展中心,到目前為止有超過500名會員,主要項目之一係「晴空計劃」,為SEN學童提供40節小組訓練,教情緒控制、社交等,「目前只有4組,每組6個名額,好多人輪候,平均等3個月」。

佢哋亦想拓展家長工作,希望學童家長都可以得到支援,「最理想係小朋友參加計劃,家長就有專人跟進,親子同步接受服務,效果最好,但𠵱家只可以揀較嚴重嘅個案,先有家長服務」。無論學童小組定家長支援,都需要籌到足夠資金,聘請人手先做到。

除咗SEN工作,籌款仲會用嚟做社區活動,所以今次籌款目標都訂得幾高㗎,「過往每年籌到30幾萬元,今年以60萬元為目標,希望更多學校願意動員,親子亦可以一齊報名,做呢件有意義嘅事」。

賣旗地區喺新界,時間為早上7:00至中午12:30,合共需要1500名義工,有興趣參與可以去goo.gl/forms/MBLIlgB8OkDPBvhy2登記。

[Happy PaMa 教得樂 第194期]

相關字詞﹕每日明報-Happy Pa Ma