【明報專訊】人人都知運動對身體好，不過要叫細路放低手機，郁動下身體，有時真係難過登天。不過，Mama最近就搵到一個大好良機，可以鼓勵佢哋做運動，就係第七屆全港運動會（下稱港運會）喇！
港運會2019年正式舉行，𠵱家已經開展地區選拔，即係全港十八區先篩選，派代表下年一較高下。
兩個豆丁平日唔多運動，Mama冇寄望佢哋會參賽，但港運會嘅另一目標係推廣全民運動，所以由今個暑假起，已經有唔少活動畀普羅大眾同兒童參與其中。
其中一個「星級教室」，喺今年7月至11月期間，田徑、排球、五人足球、籃球等八個體育項目嘅精英運動員，將會進行技術示範，又會同在場人士互相切磋，一方面騷下實力，另一方面鼓勵公眾試下唔同運動。5歲以上就可以報名參加，同專業運動員埋身接觸喇！
有時Mama聽到家長朋友呻，想畀囝囡上體育班，又唔知邊樣運動啱，今屆新增嘅「奧夢‧邊種運動我至Fit」就幫到手。
只要小朋友夠6歲，就可以接受6項體適能測試，包括手握力、立定跳遠、平板支撐等，先睇教學短片，再喺退役香港運動員輔助下接受測試。完成晒所有測試，就能夠製作體適能圖表，分析自己嘅強弱項，發掘最適合嘅運動項目。搵啱專長之後，想持續鍛煉，甚至做出一番成績，都唔係難事吖。
教師帶頭做運動增動力
而暑假過後，港運會就會將活動延伸入校園，邀請全港中小學喺陸運會期間，舉行「港運會7分鐘心連心活力跑」。即使冇參加陸運會比賽嘅同學，都可以同老師、家長一齊，喺港運會主題音樂下慢跑。看似簡單嘅活動，香港五人足球代表隊成員廖億誠就話意義重大，事關佢修讀香港教育大學嘅體育教育學士課程，深知老師對學生有好大影響力，「如果老師帶頭做運動，本身少做運動、唔留意體育嘅同學，都會有動力參與」。
■第七屆全港運動會
[Happy PaMa 教得樂 第196期]
