有話說﹕新手媽媽壓力

文章日期:2018年7月3日

【明報專訊】早幾日有朋友初為人母,梗係可喜可賀啦!想當年Mama生咗第一胎,開心還開心,但就有一個大問題,就係瞓唔夠喇。一嚟要長時間照顧初生BB,二嚟飲食同作息習慣都改變,成日都睡眠不足。

超過九成產後經常唔夠瞓

Mama知道呢個狀况普遍到不得了。話說今年5月,香港幼兒教育及服務聯會(下稱「幼聯」)同P&G合作,做咗一個「媽媽壓力調查」,訪問274名育有0至6歲小朋友嘅媽媽。超過九成表示產後經常唔夠瞓,令精神健康受影響。

放完10星期產假,重返職場,新手媽媽面臨嘅壓力仲大。有七成人擔心工時太長而照顧唔好BB,又有六成人太掛住小朋友,工作期間集中唔到精神,喺平衡家庭同事業上感到好矛盾。

咪以為全職媽媽毫無壓力,佢哋無時無刻都肩負起照顧家庭嘅重任,更加缺乏喘息空間。臨牀心理學家鄧詩琪向Mama分享,全職媽媽容易感到孤單,情緒低落嗰陣,又無得靠工作分散注意力,「加上佢哋負起全部育兒嘅責任,一旦發現小朋友有身體、心理障礙,媽媽嘅自信心都傾向低落」。

講咗咁多壓力來源,唔通對生仔要避之則吉?又唔使太擔心,鄧詩琪畀咗好多建議,都有助紓緩新手媽媽嘅壓力。首先,產前產後都要密切留意情緒變化,「如果出現失眠、情緒不穩、食慾大變、唔想同親友接觸等徵狀,而且持續兩星期或以上,就最好尋求心理輔導」。

建議公司提供彈性上班

另外,家人支持都相當重要,所以媽媽們要認清楚,即使有小朋友,夫妻關係仍然係家庭核心,「不論幾忙都要互相溝通,好好維繫同丈夫嘅關係。家人、親友亦可以多聆聽媽媽嘅心聲」。

在職媽媽就要循序漸進咁適應工作,既然返到屋企要湊小朋友,就盡量喺上班時段內完成工作。當然,最理想係公司都幫一把,考慮提供兩星期或以上彈性工作時間,幫助新手媽媽適應人生新一頁。

[Happy PaMa 教得樂 第197期]

明報影片