【明報專訊】「十大傑出青年」大家就聽得多，原來坊間有一個「十大傑出家長」選舉，大家又聽過未？
呢個選舉係由非牟利機構香港家長協進會主辦，每兩年一屆，今年已經第五屆，目的係畀對家庭同社會教育工作付出貢獻嘅家長一個肯定同埋認同。呢個選舉幾年來有唔少校長同校董推薦喺教養上非常盡心盡力嘅家長參加，而今屆（第五屆）嘅選舉已經圓滿結束，8月中舉行頒獎禮。今次令Mama注意到呢件事嘅，係因為得獎者中有一個大家都認識嘅人，佢就係上年美國萬通小太空人Chloe嘅媽媽，亦係擁有藝人身分嘅傅楚惠（Olivia）啦！
女兒邀參加 藝人傅楚惠膺選
點解Olivia參加呢次選舉呢？佢話畀Mama聽，原來有一次同阿女一齊睇報紙見到呢個活動，「當時覺得好搞笑，我都係第一次聽到，但當阿女知道有呢個活動就叫我參加」。未答應囡囡前，佢先周圍搵有關活動嘅資料，發覺曾經有知名人士作活動宣傳大使，而今次前立法會主席曾鈺成更加係評審之一，令Olivia覺得選舉都幾具認受性。不過參加競選需要有提名人，呢個時候阿囡竟然主動請纓，「佢話你係我家長，𠵱家係選傑出家長，所以我當然有資格！」
先交兩篇文章 再闖三關
選舉評審過程一啲都唔馬虎，參加者同提名人都要寫一篇文章，之後仲要經過三輪評審，最後一輪仲係由曾鈺成親自做評判同家長傾偈，同考小太空人真係差唔多咁難。不過，Olivia最後都順利勝出，佢同Mama講時嘅語氣都仲有啲激動，「我一直都認為家長係小朋友嘅第一個導師，我讀兒童心理學同幼兒教育都係想將教育嘅睇法分享畀更多人知、想鼓勵每一個家長。今次真係好多謝囡囡，佢又送多咗一份大禮物畀我啦！」
[Happy PaMa 教得樂 第198期]
